Yosua 1

₁Baka a dede fu Moses, a knekti fu MASRA, MASRA taki nanga Yosua, a man di ben e yepi Moses. Yosua ben de a manpikin fu Nun. MASRA taigi en taki: ₂“Mi knekti Moses dede. Now yu mus meki yu srefi klari fu koti a Yordanliba abra, yu nanga a heri folku disi. Un mus go na a kondre di Mi sa gi den, leki Israelitisma. ₃Soleki fa Mi ben taigi Moses, Mi o gi unu ala presi pe un sa poti un futu. ₄A presi fu unu o waka fu a bigi dreisabana go te na a Libanon, èn fu a bigi Eufratliba nanga a heri kondre fu den Hetitisma, go te na a Bigi Se na westsei. ₅No wan sma o man kaka futu gi yu, yu heri libi langa. Soleki fa Mi ben de nanga Moses, na so Mi sa de nanga yu. Mi sa de ala ten nanga yu, Mi no sa gwe libi yu. ₆Yu mus tranga èn yu mus abi dek'ati, bika na yu mus tiri a folku disi te den o teki a kondre abra. Mi ben sweri gi den afo fu den tak' Mi bo gi den a kondre. ₇Sorgu nomo taki yu tranga trutru, taki yu abi dek'ati èn taki yu e hori yusrefi fin'fini na a heri wèt di Mi knekti Moses ben leri yu. No broko den noiti, dan ala sani san yu o du sa waka bun. ₈Yu mus taki dorodoro san skrifi ini a buku fu a wèt èn dei nanga neti yu mus poti prakseri na en tapu, fu yu kan du ala sani fin'fini san skrifi na ini. Dan so ala sani san yu o du, o waka bun. ₉Memre tak' Mi komanderi yu taki yu mus tranga èn taki yu mus abi dek'ati. No beifi èn no meki noti skreki yu, bika MASRA, yu Gado, de nanga yu, alasei pe yu sa go.”

₁₀Dan Yosua komanderi den ofisiri fu a folku taki: ₁₁“Un mus waka ini a heri kampu fu komanderi den sma tak' den mus poti nyanyan klari. Bika tra tamara un sa koti a Yordanliba abra fu go teki a kondre abra di MASRA, a Gado fu unu, sa gi unu.” ₁₂Yosua taigi den sma fu a lo fu Ruben, den di fu a lo fu Gad nanga a afu lo fu Manase taki: ₁₃“Un no mus fergiti san Moses, a knekti fu MASRA, ben komanderi unu. A ben taigi un tak' MASRA, a Gado fu unu, o gi un freide now èn A o gi unu a kondre disi. ₁₄A ben taigi unu tu tak' den uma fu unu, den pikin nanga den meti fu unu kan tan dyaso na a sei disi fu a Yordanliba, di a gi unu leki un tanpresi. Ma ala den dyadya fetiman fu unu sa hari go nanga ala den fetisani fu den, na fesi fu den brada fu unu, fu go yepi den feti. ₁₅Den mus tan te leki MASRA gi den brada fu unu freide tu, neleki unu, èn te leki densrefi teki a presi abra di MASRA, a Gado fu unu, sa gi den. Dan fosi un kan drai kon baka na un eigi kontren di Moses, a knekti fu MASRA, gi unu, fu un teki en abra.” ₁₆Den sma fu a lo fu Ruben, Gad nanga a afu lo fu Manase piki Yosua taki: “Un sa du ala san yu komanderi unu èn un sa go alasei pe yu sa seni unu. ₁₇Leki fa un ben arki san Moses ben e taigi unu, na so un sa arki san yu e taigi unu. Wi e winsi nomo tak' MASRA, yu Gado, sa de nanga yu leki fa A ben de nanga Moses. ₁₈Un sa kiri iniwan sma di no wani arki san yu e taki èn di no wani du not'noti fu den sani san yu e komanderi. Ma yu mus tranga èn yu mus abi dek'ati!”