Yosua 2

₁Dan Yosua, a manpikin fu Nun, komanderi tu man fu go luku kibrikibri fa sani e waka ini a kondre nanga spesrutu ini Yeriko. A ten dati den Israelitisma ben de na wan presi di den e kari Sitim. Dan den tu man go. Di den doro ini Yeriko, den go na a oso fu wan motyo di ben nen Rakab, fu psa a neti drape. ₂Ma sma go piki a kownu fu Yeriko taki: “Yere, tide neti wantu man fu Israel kon ini a kondre fu luku fa sani e waka.” ₃Ne a kownu seni a boskopu gi Rakab taki: “Meki den man di de ini yu oso kon na dorosei, bika na kon den kon fu luku fa sani e waka ini a kondre.” ₄Ma a uma di ben kibri den tu man, piki taki: “A tru tak' den man ben kon dyaso na mi. Ma mi no ben sabi pe den kmoto. ₅Den gwe di dungru e fadon, fosi a bigi doro fu a foto ben sroto. Mi no sabi pe den go. Ma un go es'esi na den baka, dan un kan kisi den ete.” ₆Ma Rakab ben meki den man kren go tapu a plata daki fu a oso èn a ben kibri den ondro ipi vlasgrasi di a ben poti drape. ₇Den man fu kownu hari go na den baka, na a sei fu Yordanliba pe sma e koti abra èn den man fu a foto sroto a bigi doro fu a foto leki fa den man ben hari gwe.

₈Dan a uma kren go na den man tapu a daki fosi den sribi. ₉A taigi den taki: “Mi sabi tak' MASRA gi unu a kondre disi. Wi e frede te fu dede gi unu. Ala den sma fu a kondre e beifi srefsrefi gi unu. ₁₀Bika wi yere fa MASRA ben meki a Riet Se kon drei gi unu, di un ben kmoto na Egipte. Wi yere tu fa un kiri Sikon nanga Og, den tu kownu fu den Amoritisma, na a tra sei fu a Yordanliba. ₁₁Di wi yere den sani dati, wi kon frede srefsrefi gi unu èn wi kon lasi ati. Bika MASRA, a Gado fu unu, na wan Gado di abi makti na heimel nanga na grontapu. ₁₂Dat' meki mi e begi unu fu un sweri now gi mi na MASRA, tak' un o du mi nanga mi famiri wan bun, soleki fa mi du unu wan bun. Un gi mi a dyaranti, ₁₃tak' un no o kiri mi p'pa nanga mi m'ma, den brada nanga den sisa fu mi noso no wan fu den sma fu den èn taki yu o kibri wi fu wi no dede!” ₁₄Den man piki a uma taki: “Efu yu no taigi no wan sma dati wi ben de dyaso, wi e tnapu dyaranti gi yu nanga wi eigi libi. Dan te MASRA gi unu a kondre disi, un o du san un pramisi.”

₁₅Rakab ben e libi ini wan oso di ben meki ini a skotu fu a foto. So a meki den tu man saka nanga wan titei fu wan fensre go na gron. ₁₆A taigi den taki: “Un meki muiti fu doro na den bergi, noso den man di e suku unu o kisi unu. Un mus kibri dri dei drape, te leki den man drai kon baka. Baka dati un kan gwe.” ₁₇Den man taigi en taki: “Wi no o man gi yu a dyaranti di yu meki wi sweri gi yu, efu yu no du san wi o taigi yu now. ₁₈Arki, te wi o kon ini a kondre, yu mus tai a redi titei disi na a fensre pe yu meki un saka. Yu mus sorgu tak' yu p'pa nanga yu m'ma, den brada fu yu nanga ala yu tra famiri, de ini a oso na yu. ₁₉Den o kiri ibri sma di kmoto kon na dorosei. Dati no o de unu fowtu, ma na a sma suku en eigi dede. Efu den kiri wan sma di de ini yu oso, dan den kan kiri wi tu. ₂₀Ma efu yu taki a tori fu unu nanga tra sma, dan wi no e hori wisrefi moro na a dyaranti di yu meki wi sweri gi yu.” ₂₁A uma piki den taki: “Sani sa waka soleki fa un taki.” Dan a meki den man gwe. Baka dati a tai a redi titei na a fensre.

₂₂Den man hari go na den bergi. Den tan dri dei drape, te leki den man di ben go na den baka drai go baka ini a foto. Den man dati ben suku den tu man alasei, sondro fu feni den. ₂₃Dan den tu man drai kmoto fu den bergi. Den koti a Yordanliba abra dan den go na Yosua, a manpikin fu Nun, èn den ferteri en ala san ben psa. ₂₄Den taigi Yosua taki: “MASRA gi a heri kondre abra na unu. Ala den sma fu a kondre e beifi srefsrefi gi unu.”