Yosua 5

₁Di den kownu fu den Amoritisma na westsei fu a Yordanliba, nanga ala den kownu fu den Kananitisma krosbei fu a se, yere fa MASRA drei a watra fu a Yordanliba gi den Israelitisma te leki den ben koti abra, den kon frede srefsrefi gi den Israelitisma èn den kon lasi ati.

₂Baka di den ben koti abra MASRA taigi Yosua taki: “Meki nefi fu ston dan yu e besnei den Israelitisma baka.” ₃So Yosua meki nefi fu ston dan a besnei den Israelitisma na a Pikin bergi fu den fesibuba. ₄Yosua du dati fu di ala den mansma di ben hari kmoto na ini Egiptekondre, den mansma di ben man feti ini a legre, ben dede ondro pasi ini a bigi dreisabana. ₅Ala den mansma dati, di ben kmoto na Egipte, ben besnei kba. Ma no wan fu den manpikin di ben gebore ini a bigi dreisabana, baka di den kmoto ini Egipte, ben besnei. ₆Bika na fotenti yari den Israelitisma ben waka ini a bigi dreisabana, te leki ala den sma ben dede di ben hari kmoto na ini Egipte. Den dede fu di den no ben arki MASRA. Dat' meki MASRA ben sweri tak' A no bo meki den si a kondre, di A ben sweri gi den afo fu unu taki A bo gi unu. Wan kondre pe merki nanga oni de bogobogo. ₇Ma A meki den manpikin fu den teki den presi. Na den Yosua besnei now, bika di den ben de na pasi, den no ben besnei. ₈Baka di ala sma ben besnei, den tan ini a kampu te leki den ben kon betre. ₉Dan MASRA taigi Yosua taki: “Tide Mi puru a syen na un tapu, taki un ben de srafu ini Egipte.” Na dat' meki den kari a presi dati Gilgal te tide.

₁₀Di den Israelitisma ben de na Gilgal, tapu den bigi opo wei fu Yeriko, den hori a Paskafesa a neti fu a di fu tin-na-fo dei fu a mun dati. ₁₁A dei baka di den nyan a Paska, den nyan brede di ben meki sondro dyesi nanga losi karu. A karu di den ben nyan ben e gro ini a kondre dati srefi. ₁₂Sensi a dei dati, di den bigin nyan fu den pranigron fu Kanaan, a manna no fadon moro. Den Israelitisma no kisi manna moro. A yari dati den nyan fu den pranigron fu Kanaan.

₁₃Wan leisi Yosua ben e waka ini a birti fu Yeriko. Ne wantronso a si wan man nanga wan deigri ini en anu tnapu na en fesi. Yosua waka go na en tapu, dan a aksi en taki: “Yu na wan fu wi noso fu a feyanti?” ₁₄A man piki en taki: “No wan fu den tu. Mi na a fesiman fu a legre fu MASRA. Na dat' meki mi kon.” Yosua trowe ensrefi nanga fesi tapu gron, a boigi dan a aksi a man taki: “Masra, mi na yu knekti, san yu kon fu komanderi mi?” ₁₅A edeman fu a legre fu MASRA piki Yosua taki: “Puru yu susu na yu futu, bika a presi pe yu tnapu, santa.” Dan Yosua du dati.