A di fu dri singi: Strafu nanga howpu
1Mi na wan man di sabi san na pina, te Gado e strafu nanga atibron.
2A teki mi na mi anu dan A tyari mi go ini dipi dungru.
3Trutru, na heri dei A e naki mi dorodoro.
4Mi meti nanga mi buba no man teki en moro,
ala mi bonyo broko.
5A lontu mi,
tapu mi fu ala sei nanga pina èn nanga problema.
6A meki mi libi ini dungru presi, leki den wan di dede olanga kba.
7A tapu mi fu ala sei, tai mi nanga kopro keti.
8Awinsi mi e bari suku yepi A no e arki mi srefsrefi.
9A tapu mi pasi nanga bigi ston, A meki mi lasi pasi.
10A luru na mi tapu leki wan beer, leki wan lew ini en kibripresi.
11A srepi mi puru fu a pasi,
A priti mi dan A libi mi wawan didon drape.
12A hari a bo fu En span, marki en peiri na mi tapu.
13A sutu mi ini mi ati nanga den peiri fu a kokro fu En.
14Ibri dei a pipel fu mi e singi e dreigi mi.
15A furu mi bere nanga bita nyanyan,
gi mi a moro bita dringi fu dringi.
16A meki mi kaw ston broko mi tifi, A poti mi didon ini a santi.
17Mi no sabi moro san a wani taki fu abi freide,
koloku mi no sabi srefsrefi moro.
18Mi e prakseri taki: Mi no abi langa moro fu libi,
mi no abi howpu moro tapu MASRA.
19Te mi prakseri a tranga ten
nanga a waka di mi e waka lontu nomo,
a de leki wan bita dresi ini mi mofo.
20Ala leisi te mi prakseri baka mi e firi broko.
21Ma mi no e lasi howpu, bika mi e hori mi na a sani disi:
22dati na a bunfasi fu MASRA hori wi na libi,
a sari-ati fu En no abi kba.
23ala mamanten baka A e sori wi den na tapu wan nyun fasi.
Sma kan bow ala ten na Yu tapu!
24Mi e taki disi: MASRA na ala san mi abi fanowdu,
na dat' meki mi e tan howpu na En tapu.
25MASRA bun gi den di e ferwakti ala sani fu En,
gi ala sma di e suku En.
26A bun fu wakti tiri tapu MASRA, tapu a ferlusu fu En.
27Na wan bun sani fu leri abi pasensi ini yu yongu yari.
28Te Gado e meki sani miti un fu leri dati,
dan un mus sidon tiri unu wawan.
29Un mus saka unsrefi, beni un ede te na gron, kande howpu de.
30Un mus poti un seifesi gi a sma di naki unu,
un mus tan teki syen te un no man moro.
31Bika MASRA no e poti sma na wan sei fu têgo.
32Te A meki wan sma abi sari ini en libi
A e sorgu gi a sma tu
fu sori a sma a bunfasi fu En.
33A no e prisiri te sma de ini benawtu, noso te den e sari,
34te den e trapu strafuman alasei na grontapu.
35te den no e gi wan sma a leti di a mus kisi
ala di den sabi taki a Moro Hei Gado e si ala sani.
36Masra e si te krutu no e koti na tapu wan leti fasi.
37Suma kan taki meki wan sani de, di no ben de?
Na MASRA wawan kan komanderi so.
38Na a Moro Hei Gado e komanderi fu bigi ogri nanga bun sani psa.
39Dan fu sanede sma e kragi te den de na libi?
Meki den kragi fu den sondu?
40Meki un ondrosuku a fasi fa un e libi fin'fini,
èn meki un drai go na MASRA.
41Meki un langa un anu, meki un begi Gado nanga wi heri ati:
42Un sondu, un no ben wani du san Yu ben taki, èn Yu no gi wi pardon.
43Na ini ala sani Yu meki wi si a atibron fu Yu,
Yu kon na un baka,
Yu kiri un sondro wan dropu sari-ati.
44Yu tapu Yusrefi na ini wan wolku,
den begi fu wi no man psa srefsrefi kon na Yu.
45Yu meki sma e si un leki doti,
un tron a moro lagi sani di de ini a ai fu den tra folku.
46Ala den feyanti fu wi e kosi wi trangatranga.
47Frede naki wi, den seti sani fu fanga wi, den broko wi, masi wi.
48Mi ai e lon watra bogobogo, bika den kiri a lobi pipel fu mi,
49Mi ai e tan lon watra, mi no man tapu fu krei,
sondro fu teki bro,
50te leki MASRA luku fu heimel kon na gron, te leki A si mi.
51Mi e firi wan dipi sari fu si den sani di miti den umasma fu a foto.
52Den feyanti kon na mi baka leki fa sma e onti fowru,
ma mi no ben du den noti.
53Den poti mi libilibi ini wan peti, dan den tapu en nanga ston.
54A watra ben tapu ala mi ede, mi prakseri taki: Mi o sungu.
55MASRA, mi e bari kari Yu fu te na gron fu a peti.
56Yu e yere a sten fu mi,
no tapu Yu yesi gi a dyeme di mi e dyeme,
gi a bari di mi e bari kari suku yepi.
57Yu de krosbei te mi e bari kari Yu, Yu e taigi mi: “No frede.”
58MASRA, na Yu e feti a tori fu mi na krutu,
na Yu e ferlusu a libi fu mi.
59Yu e si, MASRA, fa den feyanti fu mi du mi ogri,
tye, meki mi kisi mi leti.
60Yu e si fa den de nomo fu pai mi baka,
ala den mofo di den meki fu du mi wan sani.
61Yu e yere, MASRA,
fa den e teki mi meki spotu,
ala den mofo di den meki fu du mi wan sani,
62a fasi fa den feyanti fu mi e taki nanga mi,
den sani di den e taki bakabaka, a heri dei.
63Luku fa den e tyari densrefi:
na mi den e teki e meki spotu nanga den singi fu den.
64MASRA, Yu o pai den baka fu den sani di den du.
65Tranga a ati fu den, fluku den!
66Meki a atibron fu Yu de nomo na den baka, figi den puru na grontapu.
