A di fu fo singi: A bakapisi fu a broko di Yerusalem broko
1Tye, fa a du kon dati a gowtu no e brenki moro,
dati a moi fini gowtu kon lasi en kloru?
Den santa ston fu a tempel didon tapu den uku fu ibri strati.
2A pipel fu Sion di sma ben gi so furu grani,
a pipel di ben warti moro fini gowtu,
tye, a no de noti moro leki wan kleipatu,
wan sani di wan man meki di e wroko nanga kleidoti.
3Bus'dagu srefi e gi den pikin fu den bobi fu dringi,
ma a lobi pipel fu mi no abi no wan dropu sari-ati,
den de leki den struisfowru fu a sabana
di e gwe libi den eksi fu den.
4A tongo fu den nyunyun pikin drei,
pikin e begi fu wan pisi brede,
ma no wan sma ben langa wan pisi gi den.
5Den sma di ben gwenti nyan switi nyanyan,
e dede now fu angri na tapu strati,
den sma di ben gro kon nanga bun diri krosi
e suku nyanyan tapu dot' ipi.
6Bika den sondu fu a lobi pipel fu mi ogri moro den sondu fu Sodom.
Ini wan pingi fu wan ai Gado ben figi a foto disi puru na grontapu,
sondro fu wan sma ben sari fu dati.
7Wan ten ben de pe den edeman fu Yerusalem ben krin ini Gado ai.
den no ben doti densrefi,
Den skin ben redi leki koraal, den fesi ben moi leki lasurston.
8Ma now den kon blaka leki krofaya,
na strati sma no sabi moro taki na den.
Den kon mangri sote tu
èn den buba kon drei leki udu.
9A moro betre fu dede ini bigi feti, dan fu dede fu angri:
den e dede gwe fu angri fu di den pranigron no e gi not'noti.
10Uma nanga switi maniri abi fu bori den eigi pikin,
Di a lobi pipel fu mi ben de ini bigi benawtu
den ben abi fu nyan den pikin.
11MASRA lusu En atibron na den tapu, a puru En atibron na den tapu,
Iya, A leti wan faya ini Sion, ala den fundamenti fu en bron.
12No wan kownu fu grontapu ben bribi so wan sani,
no wan sma fu grontapu tu,
dati feyanti ben o man psa den bigi doro kon ini Yerusalem.
13Na a bakapisi fu den sondu fu den profeiti fu en,
a bakapisi fu den kruktudu fu den priester fu en.
Den ben meki a brudu fu sma di bun ini Gado ai lon ini a foto.
14Leki brenisma den profeiti nanga den priester ben e waka tapu strati,
den ben doti densrefi nanga brudu,
sma ben e koti pasi gi den.
15Sma ben bari gi den taki: “Un gwe! Un no krin ini Gado ai!
Un gwe, un no fasi mi!”
Na so den hari kmopo drape go waka lontu nomo.
Ala sei sma ben taki: “Dyaso den no kan tan!”
16MASRA srefi panya den go na ala sei,
A no e luku den moro na wan ai.
Sma no abi lespeki moro gi den priester,
sari-ati no de moro tu gi owrusma.
17Un luku te un no man luku moro fu sma fu yepi unu,
ma fu soso.
Un tnapu ini den hei wakti-oso fu un e luku,
ma a folku di un e ferwakti no man tyari yepi gi unu.
18A feyanti ben e hori un na ai, tapu den pren srefi un no ben man go.
Un ben kan teri den dei fu unu, a libi fu un ben e kon na wan kba.
19Den wan di ben de na un baka,
gaw moro den aka di e frei kon grabu wan meti.
Den e kon na un baka tapu den bergi,
den ben seti luru gi unu ini a bigi dreisabana.
20A kownu, a libibro fu unu,
a wan di MASRA ben salfu,
a fadon ini wan olo di den ben diki.
A wan fu san un ben prakseri
taki na en bo kibri unu na mindri den tra folku.
21Sma fu Edom, un mus breiti, un mus prisiri srefsrefi,
un di e libi ini a kondre Us.
A kan o doro na yu mofo tu,
yu o dringi drungu
èn yu o kon ini bigi syen.
22Yu kba pai fu den sondu fu yu, Sion,
A no o meki feyanti tyari yu gwe moro nanga tranga,
ma A o strafu den kruktudu fu yu, Edom, A o tyari den kon na krin.
