Nomru 19

₁MASRA taigi Moses nanga Aaron taki: ₂“Disi na den wèt na san MASRA wani taki un mus tan hori unsrefi: Taigi den Israelitisma taki den mus tyari wan redi kaw kon gi yu. Noti no mus mankeri a kaw èn noiti a kaw disi ben mus hari a wrokosani fu drai a gron. ₃Yu mus a gi a kaw na priester Eleasar. Dan den sa tyari a kaw go dorosei fu a kampu dan den srakti en na en fesi. ₄Priester Eleasar sa dopu en finga ini a brudu dan a dropudropu en seibi leisi go na fes'sei fu a tenti pe yu kan miti nanga Gado. ₅Baka dati den sa bron a kaw tron asisi na en fesi. Den sa bron a buba fu en, a meti fu en, a brudu nanga a owru nyanyan di ben de ini en bere. ₆A priester sa fringi sedre-udu, hysop nanga karmosijn go ini a faya pe a kaw e bron. ₇Baka dati a priester sa wasi en krosi nanga en skin. Dan fosi a kan kon ini a kampu baka. Ma ensrefi no krin te leki neti fadon. ₈A sma di bron a kaw sa wasi en skin nanga en krosi, ma a no sa de krin te leki neti fadon. ₉Wan sma di krin sa krabu a asisi fu a kaw kon na wan dan a go poti en dorosei fu a kampu tapu wan krin presi. Drape den sa poti en na wan sei gi den Israelitisma fu meki watra nanga en fu kisi pardon fu sondu. Na wan sani fu kisi pardon fu sondu. ₁₀A sma di ben krabu a asisi kon na wan sa wasi en krosi, èn a no sa de krin te leki neti fadon. Disi na wan sani di den Israelitisma nanga den doroseisma di de na un mindri sa tan du.

₁₁A sma di fasi a dedeskin fu wan libisma no sa krin seibi dei langa. ₁₂Tapu a di fu dri dei a sma sa krin ensrefi nanga a watra, èn tapu a di fu seibi dei a sa krin baka. Efu a no krin ensrefi tapu a di fu dri dei, dan a sma no sa krin tu tapu a di fu seibi dei. ₁₃A sma di fasi wan dedeskin, a skin fu wan sma di dede, dan a no krin ensrefi e doti a santa tenti fu MASRA. Sowan sma den mus yagi fu têgo kmoto na mindri fu den Israelitisma. A sma no krin fu di a no meki den fringi a watra na en tapu fu a kon krin.

₁₄Disi na a wèt te wan sma dede ini wan tenti: Ala sma di go ini a tenti no sa krin fu seibi dei langa. Ala sani di de ini a tenti no sa krin fu seibi tu. ₁₅Ala kroiki di no ben tapu nanga wan duku no sa krin tu. ₁₆Ala sma di fasi a dedeskin fu wan sma di dede ini wan feti, a dedeskin fu wan sma, den bonyo fu wan dedesma noso wan grebi no sa krin seibi dei langa. ₁₇Den sa teki pikinso fu a asisi fu a meti di den bron fu meki a sma kon krin baka. Dan den sa poti en ini wan kroiki nanga watra fu wan bron. ₁₈Wan sma di krin sa teki hysop, a sa dopu en ini a watra dan a dropudropu en tapu a tenti, tapu ala den kroiki, tapu ala den sma di de ini a tenti nanga tapu a sma di fasi den dedebonyo, a skin fu a sma di den kiri, a dedeskin noso a grebi. ₁₉A sma di krin sa dropudropu a watra tapu a di fu dri dei nanga tapu a di fu seibi dei tapu a sma di no krin. Tapu a di fu seibi dei a sma sa kon krin. A sa wasi en skin nanga en krosi èn te neti tapu a sa krin baka. ₂₀A sma di no krin ma a no meki den krin en, den mus yagi fu têgo kmoto na mindri fu den Israelitisma. Bika sowan sma doti a santa presi fu MASRA. A sma dati doti. A no meki den fringi watra na en tapu fu a kon krin baka. ₂₁Disi sa de wan sani di den mus tan du. A sma di fringi a watra mus wasi en krosi. A sma di fasi a watra fu meki sma kon krin baka, no sa krin te leki neti fadon. ₂₂Ala sani di wan sma fasi di no krin, doti tu èn efu wan sma fasi a sma di no krin, dan ensrefi no krin tu te leki neti.”