A wondru nanga a ambeiri
1Wan leisi den profeiti taigi Elisa taki: “Luku, a presi pe wi e kon makandra nanga yu, kon pikin. 2Meki wi go na a Yordanliba go koti wantu bon fu meki wan nyun presi pe wi kan kon makandra.” Elisa piki den taki: “Un kan go.” 3Ma wan fu den aksi en taki: “Du den knekti fu yu wan bun fu go nanga wi.” A piki den taki: “A bun.” 4So a go nanga den. Di den doro na a Yordanliba, den bigin kapu bon. 5Ma di wan fu den ben e kapu wan bon, a ambeiri lusu kmoto na a tiki dan a fadon go ini a watra. A man bari, dan a taigi Elisa taki: “San mi mus du masra, na leni mi leni en!” 6Dan a man fu Gado aksi en taki: “Pe a fadon?” Di a man sori en, Elisa koti wan pisi udu, dan a fringi en go na a presi, èn a ambeiri kon na loktu baka. 7Dan Elisa taigi a man taki: “Puru en ini a watra.” Ne a man langa en anu teki en.
Elisa e yepi a kownu fu Israel ini a feti nanga Aram
8A kownu fu Aram, ben e feti nanga Israel. Dan a gi den ofisiri fu en rai pe nanga pe den ben mus meki den kampu. 9Ma a man fu Gado, seni wan boskopu gi a kownu fu Israel taki: “Luku bun, no psa na sowan presi, bika a legre fu Aram seti densrefi drape.” 10Dan a kownu fu Israel ben e seni sma go na a presi di a man fu Gado ben taigi en fu warskow den sma fu a birtu fu den luku bun. Na so a sani ben e go, ala leisi baka. 11A sani disi ben meki a kownu fu Aram kisi atibron. A kari den ofisiri fu en, dan a aksi den taki: “Un kan taigi mi sortu wan fu wi de na a sei fu a kownu fu Israel?” 12Ma wan fu den piki en taki: “Mi kownu, no wan fu wi e du a sani dati, ma na Elisa, a profeiti fu Israel. A e taigi a kownu fu Israel srefi san yu e taki na ini yu sribi kamra.” 13Ne kownu taigi den taki: “Un go suku en pe a de fu mi grabu en.” Di den seni piki kownu tak' Elisa de na Dotan, 14a seni wan tranga legre fu srudati, asi nanga fetiwagi go drape.
Den doro drape neti, dan den lontu a foto. 15Di a knekti fu a man fu Gado opo a tamara mamanten fruku go na dorosei, a si taki wan legre fu srudati, asi nanga fetiwagi, lontu a foto. Ne a knekti bari taki: “Masra, fa un o du?” 16Ma Elisa piki en taki: “Yu no abi fu frede, bika den wan di de na a sei fu unu, furu moro den wan di de nanga den.” 17Ne Elisa begi taki: “Tye MASRA, opo en ai fu a kan si den tu.” Dan MASRA opo den ai fu a knekti, dan a si taki a bergi ben furu nanga asi nanga fetiwagi fu faya di ben lontu Elisa. 18Di den Arameesrudati ben e kon fu teki Elisa, Elisa begi taki: “MASRA, breni den alamala.” MASRA du san Elisa aksi en, èn a breni den alamala. 19Dan Elisa taigi den srudati taki: “Disi no de a yoisti pasi, èn disi no de a yoisti foto pe un mus de. Un waka na mi baka, dan mi o tyari un go na a man di un e suku.” Ma Elisa tyari den go na Samaria. 20Fa den doro na Samaria, na so Elisa begi taki: “MASRA, meki den si baka.” Dan MASRA opo den ai èn den ben kan si èn den si taki den ben de ini Samaria. 21Di a kownu fu Israel si den, a aksi Elisa taki: “Mi sa kiri den, mi p'pa, mi sa kiri den?” 22Ma Elisa piki en taki: “Nono, yu no mus kiri den. Yu no e kiri srudati di yu grabu na ini wan feti. Gi den nyanyan nanga dringi dan yu e meki den drai go baka na den basi.” 23Dan kownu sorgu taki den ben abi so furu fu nyan leki efu na wan fesa den ben de. Di den nyan èn den dringi, a meki den drai go baka na den basi. Baka dati, den srudati fu Aram no ben e broko kon ini grupu ini a kondre moro, fu teki sani gwe nanga tranga.
A legre fu Aram e lontu Samaria
24Baka wan pisten, kownu Benhadad fu Aram, kari a heri legre fu en kon na wan, dan den hari go na Samaria èn den tapu a foto fu ala sei. 25Den lontu a foto so langa tak' wan bigi angriten broko ini Samaria. Gi wan buriki-ede den sma ben e pai aititenti solfrumoni, nanga feifi solfrumoni gi wan pontu doifimest.
26Wan leisi di kownu ben e waka tapu a skotu fu a foto, wan uma bari taigi en taki: “Tye mi kownu, yepi mi!” 27Ma kownu piki en taki: “Efu MASRA no e yepi yu, fa mi o man yepi yu? Mi no abi graan noso win. 28Ma ferteri mi san de fu du nanga yu.” A uma piki en taki: “A uma disi ben taigi mi taki: ‘Meki wi nyan a boi fu yu tide, dan wi o nyan a di fu mi tamara.’ 29So wi bori a boi fu mi, dan wi nyan en. Ma a tra dei di mi aksi en fu wi nyan a boi fu en, a kibri en.” 30Di kownu yere san a uma taki, a priti en krosi èn di a e waka go moro fara tapu a skotu, den sma ben man si tak' a ben weri lowkrosi ondro a tapuseikrosi fu en. 31Dan kownu taki: “Gado kan gi mi wan hebi strafu, efu mi no kapu a ede fu Elisa, a manpikin fu Safat, puru fu en neki tide.”
32A pisten dati Elisa ben de na oso. Den edeman fu Israel ben de na en. Kownu ben seni wan man go na en fesi, ma fosi a man ben doro Elisa taigi den edeman taki: “Luku, a kiriman e seni wan sma kon fu puru mi ede tapu mi neki. Un sroto a doro te a boskopuman doro fu a no kon inisei. Mi e yere den futu fu en masra leti na en baka.” 33Elisa no ben kba taki ete di a boskopuman doro. Dan kownu taki: “Luku sortu ongoloku MASRA e meki miti wi! Fu sanede meki mi mus poti mi howpu tapu MASRA ete?”