Kownu e yepi a uma fu Sunem
1Elisa ben taigi a uma, a m'ma fu a boi di ben dede, ma di Elisa ben meki kon na libi baka, taki: “Meki yu klari dan yu e go suku wan tra tanpresi gi wan pisten, yu nanga den sma di e libi ini yu oso. Bika MASRA o meki wan bigi angriten kon ini a kondre disi.” Èn a angriten kon tu, seibi yari langa. 2A uma du san a man fu Gado taigi en. A gwe nanga den sma fu en oso dan den go tan seibi yari langa leki doroseisma ini a kondre fu den Filistijnsma. 3Baka den seibi yari dati, a uma drai kon baka na Israel. Dan a go na kownu go begi en efu a kan kisi en oso nanga en dyari baka. 4A srefi momenti dati, kownu ben e taki nanga Gehazi, a knekti fu a man fu Gado. Kownu ben aksi en taki: “Ferteri mi ala den bigi sani di Elisa du.” 5Gehazi ben e ferteri kownu fa Elisa ben meki wan boi di ben dede, kon na libi baka, di a mama fu a boi dati kon aksi kownu efu a kan kisi en oso nanga en dyari baka. Ne Gehazi taigi kownu taki: “Masra, mi kownu, disi na a uma, èn dati na a boi di Elisa meki kon na libi baka!” 6Dan kownu aksi a uma fu ferteri en a tori èn a uma ferteri en. Baka dati kownu komanderi wan fu den wrokoman fu en taki: “Sorgu tak' a uma disi kisi ala den sani baka di a ben abi. Yu mus pai en tu fu ala a nyanyan di a pranigron fu en ben gi sensi di a gwe libi a kondre kon miti tide.”
Elisa na Damaskus
7Elisa ben go na Damaskus. A srefi pisten dati Benhadad, a kownu fu Aram, ben didon siki na bedi. Dan den taigi Benhadad taki a man fu Gado ben doro drape. 8Ne kownu taigi Hasael taki: “Go na a man fu Gado. Tyari wan kado gi en, dan yu e aksi en fu a aksi MASRA efu mi o kon betre fu a siki disi.” 9Dan Hasael go na Elisa nanga fotenti kameel di ben e tyari ala sortu diri sani fu Damaskus. Di Hasael doro, a go tnapu fesi Elisa dan a aksi en taki: “Yu manpikin, kownu Benhadad fu Aram, seni mi fu kon aksi yu efu a o kon betre fu a siki.” 10Elisa piki en taki: “MASRA sori mi tak' a o dede. Ma yu kan go taigi en tak' a o betre.” 11Dan a man fu Gado tan luku Hasael trangatranga te leki Hasael firi syen. Te fu kba, a man fu Gado bari krei. 12Hasael aksi en taki: “Masra, san meki yu e krei?” Ne Elisa piki en taki: “Fu di mi sabi sortu ogri yu o du nanga den Israelitisma. Yu o bron den tranga foto fu den, yu o kiri den yonkuman fu den na ini feti, den pikin yu o naki na gron meki den dede èn yu o priti den bere opo fu den uma di de nanga bere.” 13Dan Hasael aksi taki: “Fa yu knekti, di no betre moro wan dagu, o man du so wan bigi sani?” Elisa piki en taki: “MASRA sori mi tak' na yu o tron kownu fu Aram.” 14Baka dati, Hasael drai go na en basi. Dan en basi aksi en taki: “San Elisa taki.” Hasael piki en taki: “A taigi mi tak' yu o kon betre.” 15Ma a tra dei, Hasael teki wan krosi fu a bedi, a nati en, dan a bradi en tapu a fesi fu kownu meki a dede. Dan Hasael teki en presi leki kownu.
Kownu Yoram fu Yuda
16Di kownu Yoram, a manpikin fu Akab, ben de feifi yari na makti ini Israel, Yoram, a manpikin fu Yosafat, tron kownu fu Yuda. A tron kownu na a presi fu en p'pa Yosafat di ben de kownu fu Yuda. 17Yoram ben abi dritenti-na-tu yari di a tron kownu, èn a tan aiti yari na makti ini Yerusalem. 18A ben teki a eksempre fu den kownu fu Israel, leki fa den famiri fu Akab ben e du, bika a ben trow nanga wan fu den umapikin fu Akab. Yoram ben e du san no bun ini MASRA ai. 19Ma MASRA no ben wani puru Yuda na pasi fu en knekti David ede, bika a ben pramisi en tak' na soso bakapikin fu en ben o tan kownu ini Yuda.
20Di Yoram ben de na makti, den Edomitisma kmoto ondro a tiri fu Yuda èn poti den eigi kownu fu tiri den. 21Dan Yoram hari go na Sair nanga ala den fetiwagi fu en. Drape den Edomitisma ben lontu en nanga den ofisiri fu den fetiwagi fu alasei. Ma di a ben kon dungru, Yoram broko psa na den mindri. A wini a legre fu den Edomitisma èn a legre fu en lowe go baka na den oso. 22Ma Edom ben man kmoto ondro a tiri fu Yuda, te leki a dei fu tide. A srefi ten dati, den sma fu a foto Libna kmoto ondro a tiri fu Yuda tu.
23Den tra sani di psa ini a libi fu Yoram nanga ala den sani di a du, skrifi poti ini a buku fu a historia fu den kownu fu Yuda. 24Yoram dede, èn den beri en na den afo fu en ini a foto fu David. En manpikin Akasya teki en presi leki kownu.
Kownu Akasya fu Yuda
25Di kownu Yoram, a manpikin fu Akab, ben de twarfu yari na makti ini Israel, Akasya, a manpikin fu Yoram, tron kownu fu Yuda. 26Akasya ben abi tutenti-na-tu yari di a tron kownu, èn a tan wan yari na makti ini Yerusalem. En m'ma ben nen Atalya èn a ben de a granpikin fu Omri, a kownu fu Israel. 27Akasya ben teki a eksempre fu a famiri fu Akab. A ben e du san no bun ini MASRA ai, neleki fa a famiri fu Akab ben e du, bika a ben trow nanga wan frow fu a famiri fu Akab.
28Akasya ben yepi Yoram, a manpikin fu Akab, ini wan feti nanga Hasael fu Aram, na Ramot ini Gilead. Ma den Arameesrudati ben gi Yoram mankeri. 29Dan kownu Yoram gwe libi a feti. A drai go na Yisreel fu a ben kan kon betre fu den mankeri di den Arameesrudati ben gi en ini a feti na Rama nanga kownu Hasael fu Aram. Dan kownu Akasya fu Yuda, a manpikin fu Yoram, go luku Yoram, a manpikin fu Akab, di ben siki, na Yisreel.
