Lukas 10

₁Baka dati Masra teki ete seibitenti-na-tu tra man, dan A seni den tu na tu go na En fesi na ala den foto nanga presi pe En srefi ben o go. ₂A taigi den taki: “A nyanyan ini a gron lepi kba fu koti, èn a furu, ma nofo wrokoman no de. Fu dat'ede un mus begi Masra di abi a gron, fu A seni moro wrokoman go ini a gron fu koti a nyanyan. ₃So, un go. Mi e seni unu leki pikin skapu go na mindri tigri. ₄Un no mus tyari portmoni, saka, noso susu. Èn un no mus tan taki tori na pasi. ₅Te un go na ini wan sma oso, a fosi sani san un mus taki na: ‘A freide fu Gado mus de nanga unu.’ ₆Efu a sma di abi a oso na wan sma di lobi freide, dan a freide san un winsi en sa tan nanga en. Ma efu na wan sma di no lobi freide, dan a freide san un winsi en o drai kon baka na unu. ₇Te un go tan na wan sma oso, un mus tan drape. Nyan èn dringi san den gi unu, bika a fiti tak' wan wrokoman kisi en pai. Un no mus froisi fu a wan oso go na a trawan. ₈Efu den sma fu wan foto meki un kon ini a foto fu den, dan un mus nyan san den gi unu fu nyan. ₉Dresi den sikiwan drape, dan un taigi den taki: ‘Her'esi Gado o bigin tiri libisma.’ ₁₀Ma efu un doro wan foto pe den sma no wani fu un tan drape, dan un mus go na tapu strati dan un taki: ₁₁‘Srefi a santi fu a foto fu unu wi e figi puru na wi futu. Ma un mus sabi taki her'esi Gado o bigin tiri libisma.’ ₁₂Mi e taigi un taki: Tapu a bigi dei, a strafu fu a foto disi o hebi moro a strafu fu a foto Sodom.”

₁₃Dan Yesus taki: “Un sma fu Korasin nanga Betsaida, un mus luku bun! Bika efu den bigi sani di psa na un mindri, ben psa na ini den foto Tirus nanga Sidon, someni langa den sma dati ben o drai den libi. Den ben o weri rowkrosi èn sidon ini asisi fu sori taki den e sari. ₁₄Tapu a bigi krutu dei, a strafu fu unu o hebi moro di fu den sma fu Tirus nanga Sidon. ₁₅Un sma fu Kafarnaum, un e prakseri taki un o doro na heimel? Na ini dedekondre un o feni unsrefi!” ₁₆Dan Yesus taki: “A sma di e arki san un e taki, e arki Mi. Suma no wani arki san un e taki, no wani arki san Mi e taki. Èn suma no e arki Mi, no e arki a Wan di seni Mi kon.”

₁₇Den seibitenti-na-tu man ben prisiri di den drai kon baka. Den taigi Yesus taki: “Masra, te nanga den takruyeye srefi e du san un taki te un kari a nen fu Yu.” ₁₈Dan Yesus piki den taki: “Mi si fa Satan fadon fu loktu kon na gron, soleki fa faya e koti na loktu. ₁₉Luku, Mi gi unu makti fu trapu na tapu sneki nanga kruktutere. Mi gi un makti tu na tapu a heri legre fu didibri. Noti no sa du unu ogri. ₂₀Ma un no mus prisiri fu di den takruyeye e du san un taki, ma un mus prisiri fu di un nen skrifi na ini heimel.”

₂₁A srefi ten dati, a Santa Yeye furu Yesus nanga prisiri. Dan Yesus taki: “P'pa, Yu di de Masra fu heimel nanga grontapu, Mi e taki Yu tangi tak' Yu kibri den sani disi meki den koniman nanga den leriman no ferstan den, ma dan Yu sori den na den sma di no sabi furu. Iya, P'pa, bika na so Yu ben wani en.” ₂₂Yesus taki: “Mi P'pa gi Mi makti abra ala sani. Boiti a P'pa, no wan sma no sabi suma na a Manpikin. Èn no wan sma no sabi suma na a P'pa, boiti a Manpikin nanga den sma di a Manpikin wani fu sabi dati.”

₂₃Dan Yesus kari den man di ben e teki leri fu En kon na wan sei. A taigi den taki: “Un na blesi sma, fu di un e si den sani san un e si now. ₂₄Bika Mi e taigi un taki: Furu profeiti nanga kownu ben wani si san unu e si, ma den no si en. Èn den ben wani yere san unu e yere, ma den no yere en.”

₂₅Wan dei wan sabiman fu Gado wèt go na Yesus fu tesi En. A taki: “Meister, san mi mus du fu kan kisi a libi fu têgo?” ₂₆Yesus piki en taki: “San skrifi ini a wèt fu Gado? San yu e leisi drape?” ₂₇A man piki taki: “A skrifi taki: Yu mus lobi Masra, yu Gado, nanga yu heri ati, nanga yu heri sili, nanga ala yu krakti, èn nanga yu heri ferstan. Èn yu mus lobi tra sma soleki fa yu lobi yusrefi.” ₂₈Yesus taigi en taki: “Yu piki bun. Du dati, dan yu o kisi a libi fu têgo.” ₂₉Ma a man ben wani krin en fesi, dat' meki a aksi Yesus taki: “Ma suma na den tra sma?” ₃₀Dan Yesus piki en taki: “Wan man ben kmopo fu Yerusalem e go na a foto Yeriko. Di a ben de na pasi, fufuruman grabu en. Den teki ala san a ben abi, den fon en te fu dede, dan den gwe libi en didon drape. ₃₁Baka wan pisten wan priester ben e psa na tapu a srefi pasi. Di a si a man, a koti abra go waka na a tra sei fu a pasi. ₃₂Owktu wan Lefitiman ben psa drape. Di a si a man, ensrefi koti abra go waka na a tra sei. ₃₃Baka dati wan man fu Samaria kon psa. Di a doro krosbei, a si a man didon tapu a pasi, dan a firi sari gi en. ₃₄A go na a man, a krin den soro fu en nanga oli nanga win, dan a tai den. Baka dati a poti a man na tapu en eigi buriki. A tyari en go na wan oso pe yu ben kan yuru wan presi fu tan, dan a sorgu gi en. ₃₅A tra dei, fosi a man fu Samaria gwe, a gi a man di abi a presi tu solfrumoni. A taigi en taki: ‘Luku a man gi mi. Efu a moni no sari, mi sa pai yu te mi drai kon baka.’ ” ₃₆Dan Yesus aksi a sabiman fu Gado wèt taki: “Taigi Mi, sortu wan fu den dri man disi sori a man di den fufuruman grabu taki a de wan sma di e lobi tra sma?” ₃₇A piki taki: “A wan di sori sari-ati gi a tra man.” Dan Yesus taigi en taki: “Go, dan yu du a srefi sani tu.”

₃₈Yesus nanga den man di ben e teki leri fu En waka go moro fara. Di den doro na wan fu den dorpu, wan uma di ben nen Marta kari Yesus kon na en oso. ₃₉A ben abi wan s'sa di nen Maria. Maria ben sidon na Yesus futusei e arki san Yesus ben e leri. ₄₀Ma Marta ben e broko en ede nanga ala den sani san ben de fu du. Dan a go na Yesus èn a taigi En taki: “Masra, Yu no abi bisi taki mi s'sa e libi mi wawan fu du ala a wroko? Yu no kan taigi en fu a kon yepi mi?” ₄₁Ma Yesus piki en taki: “Marta, Marta. Yu e broko yu ede, èn yu e feti nanga someni sani. ₄₂Ma na wan sani nomo de fanowdu. Èn Maria teki a bun sani dati, san no wan sma no man puru na en anu.”