San Yesus taki fu a trowlibi
1Yesus kmopo fu drape, dan A go na Yudea nanga a kontren abrasei fu a Yordanliba. Agen wan lo sma kon na En, èn A bigin gi den leri soleki fa A ben gwenti fu du. 2Dan wantu Fariseiman kon na En fu tesi En. Den aksi En taki: “Wan man kan broko trow nanga en uma?” 3Yesus aksi den taki: “San Moses skrifi taki un kan du?” 4Den taki: “Moses taki tak' wan man kan broko trow, ma a mus gi a uma wan brifi san e sori taki a trow broko.” 5Yesus piki taki: “Na fu di un no wani du san Gado taki, meki Moses skrifi a sani disi. 6Ma na a bigin di Gado meki libisma, A meki den leki man nanga uma. 7Dat'ede wan man sa gwe libi en m'ma nanga en p'pa fu go libi nanga en uma. 8Dan den tu sma disi sa de leki wan enkri sma. So den no de tu sma moro, ma den de leki wan. 9Èn san Gado tyari kon na wan, libisma no mus prati.”
10Di den go na oso, den man di ben e teki leri fu Yesus aksi En a tori disi baka. 11Dan Yesus taigi den taki: “A man di broko trow nanga en uma dan a trow baka, e huru gi en fosi uma. 12Èn efu wan uma broko trow nanga en masra èn a trow baka, dan sowan uma e libi wan huru libi tu.”
Yesus blesi den pikin
13Den sma ben e tyari den pikin kon na Yesus fu A fasi den. Ma den man di ben e teki leri fu Yesus bari den. 14Di Yesus si san den man e du, a mandi srefsrefi. A taigi den taki: “Meki den pikin kon na Mi. No tapu den, bika na sma leki den pikin disi, Gado e tiri. 15Fu tru Mi e taigi un taki: Efu yu no kon na Gado leki wan pikin fu A tiri yu, dan noiti yu o man kon ondro a tiri fu Gado.” 16Yesus brasa den pikin, dan A poti anu na den tapu èn A blesi den.
Yesus nanga a guduman
17Di Yesus ben e waka go moro fara, wan man lon kon na En. A saka kindi gi En, dan a aksi En taki: “Bun Meister, san mi mus du fu kisi a libi fu têgo?” 18Yesus piki en taki: “Fu sanede yu e taki tak' Mi bun? No wan sma bun, boiti Gado. 19Yu srefi sabi san a wèt fu Gado e taki: Yu no mus kiri, yu no mus huru, yu no mus fufuru, yu no mus lei gi trawan, yu no mus bedrigi sma, èn yu mus lespeki yu m'ma nanga yu p'pa.” 20A man piki taki: “Meister, sensi mi pikin mi hori ala den wèt disi.” 21Di Yesus luku a man, a firi wan lobi gi en. Dan A taigi en taki: “Wan sani libi ete fu yu du. Go seri den sani san yu abi, dan yu e prati a moni gi pôtisma. So yu o abi wan gudu na heimel. Baka dati yu e kon waka na Mi baka.” 22Di a man yere san Yesus taki, en fesi kenki. A gwe nanga sari bika a ben abi furu gudu.
23Yesus luku lontu, dan A taigi den man di ben e teki leri fu En taki: “A sa tranga gi sma di lai moni fu den poti densrefi ondro a tiri fu Gado.” 24Den man fu En ben ferwondru fu a sani san Yesus taki. Ma Yesus taki baka taki: “Mi pikin, a tranga fu kon ondro a tiri fu Gado. 25A moro makriki gi wan asaw fu psa ini wan nanai-olo, dan fu wan guduman poti ensrefi ondro a tiri fu Gado.” 26Den man ben ferwondru srefsrefi. Den taigi Yesus taki: “Suma Gado o man ferlusu dan?” 27Yesus luku den man di ben e teki leri fu En, dan A taigi den taki: “Libisma no man du en, ma Gado man. Bika Gado kan du ala sani.” 28Dan Petrus bigin taigi Yesus taki: “Ma luku, wi libi ala sani san wi ben abi fu waka na Yu baka.” 29Yesus piki en taki: “Fu tru Mi e taigi un taki: Ala sma di libi en oso, noso en brada nanga en s'sa, noso en m'ma nanga en p'pa, noso en pikin nanga en gron fu Mi ede èn fu a bun nyunsu ede, o kisi den sani disi baka. 30Ini a libi disi Gado o gi den sma dati hondro tron so moro furu oso, brada nanga s'sa, m'ma, pikin nanga gron. Ma sma o de na den baka fu du den ogri. Dan ini a ten san e kon, A o gi den a libi fu têgo. 31Ma furu fosiwan o tron lastewan, èn furu lastewan o tron fosiwan.”
Yesus e taki a di fu dri leisi fu a pina di o miti En
32Den ben de na pasi fu go na Yerusalem èn Yesus ben e waka na fesi. Den man di ben e teki leri fu Yesus ben ferwondru, èn den tra sma di ben waka nanga den ben frede. Dan Yesus kari den twarfu man fu En kon na wan sei, dan A bigin ferteri den san nanga san o miti En. 33A taki: “Luku, un de na pasi fu go na Yerusalem. Drape den o gi a Manpikin fu Libisma abra na den prenspari priester nanga den sabiman fu Gado wèt. Den man dati sa teki a besroiti tak' A mus dede. Dan den o gi En abra na den sma di no de Dyu. 34Den o teki En leki spot'popki, den o spiti na En tapu, den o wipi En, dan den o kiri En. Ma baka dri dei, A o kon baka na libi.”
No suku fu sma dini yu, ma dini trawan
35Yakobus nanga Yohanes, den tu manpikin fu Sebedeus, kon na Yesus. Den taki: “Meister, un ben sa wani fu Yu du a sani gi unu san un o aksi Yu.” 36Yesus aksi den taki: “San un wani taki Mi mus du gi unu?” 37Den piki taki: “Un ben sa wani taki te Yu sidon na tapu Yu kownusturu, Yu sa meki wan fu unu sidon na Yu let'anu sei, èn a trawan na Yu kruktu-anu sei.” 38Ma Yesus taigi den taki: “Un no sabi san un e aksi. Un sa man nyan a pina san Mi mus nyan? Un sa wani dede a dede san Mi mus dede?” 39Den piki Yesus taki: “Iya, un sa man.” Yesus taigi den taki: “Un sa nyan a pina san Mi o nyan, èn un sa dede a dede san Mi o dede. 40Ma a no Mi e taki suma o sidon na Mi let'anu sei noso na Mi kruktu-anu sei. Gado libi den presi dati gi den sma di A wani fu sidon drape.”
41Di den tra tin man yere a tori disi, den bigin mandi nanga Yakobus nanga Yohanes. 42Dat' meki Yesus kari den alamala kon, dan A taigi den taki: “Un sabi taki den sma di e tiri den folku, e rigeri abra den. Èn den sma di abi makti e dwengi a folku fu du san den wani. 43Ma unu no mus du leki den. Efu wan fu unu wani de wan prenspari sma na un mindri, dan a mus dini den trawan. 44Èn a sma di wani de a fosiwan na un mindri, mus de leki wan srafu gi ala den trawan. 45Bika a Manpikin fu Libisma, no kon tu fu sma dini En. Ma A kon fu dini trawan èn fu gi En libi fu meki furu sma kon fri.”
Yesus yepi Bartimeus, a breniman
46Na so den doro na Yeriko. Dan di Yesus nanga den man di ben e teki leri fu En nanga wan bigi grupu sma gwe libi Yeriko, den miti nanga wan breniman di ben sidon na sei pasi. A man disi ben nen Bartimeus, èn en p'pa ben nen Timeus. 47Di Bartimeus yere taki na Yesus fu Nasaret e kon, a bigin bari taki: “Yesus, Manpikin fu David, abi sari-ati nanga mi!” 48Wan lo sma bari en fu a tapu en mofo, ma a bigin bari moro tranga taki: “Yesus, Manpikin fu David, abi sari-ati nanga mi!” 49Ne Yesus tan tnapu, dan A taigi den sma taki: “Un kari en kon.”
Dan den sma kari en. Den taki: “Hori doro. Opo kon. A e kari yu.” 50Bartimeus puru en mantel, a dyompo opo, dan a go na Yesus. 51Yesus aksi en taki: “San yu wani taki Mi mus du gi yu?” A breniman piki taki: “Masra, mi wani si.” 52Yesus piki en taki: “Yu kan go. A bribi fu yu meki yu kon betre.” Wantron a man bigin si, dan a waka a pasi go doro nanga Yesus.
