Filipi 2

₁Efu a de so taki Kristus e gi un dek'ati, efu a de so taki a lobi fu En e trowstu unu èn taki un de wan nanga makandra ini a Yeye, efu a de so taki un e firi gi makandra èn taki un e sori sari-ati na makandra, ₂dan un mus abi a srefi prakseri èn un mus sori makandra a srefi lobi. Un mus de wan na ini un denki, èn un mus agri ini san un wani. Bika dati o meki mi prisiri srefsrefi. ₃Un no mus denki unsrefi wawan, noso suku fu kisi grani fu sma. Ma nanga ala sakafasi, a wan mus si a trawan moro prenspari leki ensrefi. ₄No wan fu unu mus luku soso san bun gi ensrefi, ma ibriwan fu unu mus luku tu san bun gi trawan. ₅Un mus abi a srefi fasi di Kristus Yesus ben abi. ₆Aladi A ben de leki fa Gado de, A no ben tan hori nomo taki En nanga Gado na a srefi. ₇Ma A poti a fasi fa A ben de na wan sei. A kon de leki fa wan futuboi de, A tron wan libisma. ₈Èn leki libisma A saka Ensrefi. A du san Gado wani te leki A dede srefi: Iya, a dede na a kroisi. ₉Dat'ede Gado gi En a moro hei presi di de èn A gi En a nen di bigi moro ala tra nen, ₁₀fu meki taki ala libisani na ini heimel, na grontapu èn na ondro gron, sa saka kindi gi a nen fu Yesus. ₁₁Dan Gado a P'pa sa kisi grani te ala sma sa taki: “Yesus Kristus na Masra.”

₁₂So mi lobiwan, soleki fa un ben gi yesi ala ten di mi ben de nanga unu, un mus du dati moro ete now di mi no de na unu. Gado ferlusu unu, èn nanga bigi lespeki nanga sakafasi un mus sorgu taki a sani disi de fu si ini un libi. ₁₃Bika na Gado e wroko na ini unu. Èn na En e gi unu a wani nanga a krakti fu du den sani san e gi En prisiri. ₁₄Un mus du ala sani sondro fu knoru noso fu hari taki. ₁₅Na so un o de sondro fowtu èn sondro flaka. Un o de pikin fu Gado tapu san sma no o man sori finga. Un o brenki leki den stari fu heimel na mindri den sma di kruktu èn di abi wan takru ati. ₁₆Un mus tan hori unsrefi na a boskopu san e gi libi. Dan tapu a dei fu Kristus, mi srefi sa man meki bigi taki a muiti nanga a wroko fu mi no ben de fu soso. ₁₇A bribi fu unu de leki wan ofrandi, wan sani nanga san un e dini Masra. Awinsi mi mus gi mi brudu leki wan pisi fu a ofrandi dati, mi breiti èn mi e prisiri makandra nanga un alamala. ₁₈Unu mus breiti tu, èn un mus prisiri makandra nanga mi.

₁₉Efu Masra Yesus wani, mi o seni Timoteus her'esi kon na unu. Dan mi ati sa sidon te mi yere fa a e go nanga unu. ₂₀Bika mi no abi no wan tra sma di abi den srefi prakseri leki mi, di wani sorgu nanga en heri ati taki sani e waka bun nanga unu. ₂₁Bika ala den tra sma e suku den eigi bun. Den no e broko den ede nanga den sani fu Yesus Kristus. ₂₂Ma un srefi sabi taki Timoteus sori taki a de fu fertrow. Bika leki fa wan pikin e yepi en p'pa, na so a ben yepi mi fu panya a bun nyunsu. ₂₃Dat' meki mi e howpu fu seni en kon wantewante na unu, so esi leki mi sabi fa sani o waka gi mi. ₂₄Ma mi e fertrow tapu Masra taki mi srefi sa kon her'esi na unu.

₂₅Ma mi e feni en fanowdu fu seni brada Epafroditus kon baka na unu. Mi nanga en ben wroko èn strei makandra. Un ben seni en kon fu yepi mi nanga san mi ben abi fanowdu. ₂₆Bika ensrefi e angri fu si unu. A e broko en ede, bika un ben kisi fu yere taki a ben siki. ₂₇A tru taki a ben siki, te fu dede srefi. Ma Gado sari en. A no ben sari en wawan, A ben sari mi tu, fu mi no kisi moro sari leki san mi abi kba. ₂₈Fu dat'ede mi e seni en gawgaw kon na unu, fu un sa prisiri baka te un si en, èn dan mi srefi no sa abi someni sari moro. ₂₉So, un mus teki en na un mindri nanga bigi prisiri, soleki fa bribisma di de wan nanga Masra e du. Un mus lespeki den sortu sma disi. ₃₀Bika fu di a e wroko gi Kristus meki a doro te na grebimofo. A no ben frede fu lasi en libi srefi, nomo fu yepi mi pe unu no ben man.