Wan begi fu a tiri fu Gado
1Fu David.
MASRA, na Yu mi e kon nanga mi begi.
2Mi Gado, tapu Yu mi e fertrow,
no meki mi kon na syen,
no meki den feyanti fu mi prisiri fu mi ede.
3No wan sma di poti en howpu na Yu tapu e kon na syen.
Den sma di e kon na syen na den sma di no tan waka na Yu baka,
sondro fu wan sani psa.
4MASRA, sori mi fa Yu wani taki mi mus libi,
leri mi fu waka tapu den pasi fu Yu.
5Tiri mi meki mi libi leki fa Yu wani,
leri mi fu du dati.
Bika Yu de a Gado di e ferlusu mi,
na Yu mi e ferwakti heri dei.
6Memre MASRA fa Yu e sori wi a sari-ati
nanga a bigi lobi fu Yu bun langa kba.
7MASRA, no prakseri den sondu nanga den kruktudu
di mi du di mi ben yongu ete,
ma prakseri mi nanga a bigi lobi fu Yu,
èn nanga a bunfasi fu Yu.
8MASRA bun èn A e du sani na tapu wan leti fasi,
na dat' meki A e leri sondusma a pasi fu En.
9A e tyari den sma di trawan e si leki noti tapu a leti pasi,
èn A e leri den fu du En wani.
10MASRA e sori a bigi lobi fu En
èn taki A de fu fertrow,
na den sma di e hori densrefi na a ferbontu fu En,
èn na den sani fu En di den mus memre.
11MASRA, fu Yu nen ede,
gi mi pardon fu a kruktudu fu mi,
bika a bigi.
12MASRA e leri den sma di e lespeki En
fa den mus tyari densrefi.
13Sani o tan waka bun gi den,
èn na den pikin nanga bakapikin fu den o kisi a kondre.
14MASRA na wan mati gi den sma di e lespeki En,
A e meki den ferstan a ferbontu fu En moro krin.
15Mi e tan hori mi ai na tapu MASRA,
bika A e kibri mi gi den ogri di trawan seti fu miti mi.
16Drai luku mi èn sori mi a bun-ati fu Yu,
bika mi de mi wawan ini a pina di mi e nyan.
17Mi e frede moro nanga moro,
puru mi na ini a benawtu ini san mi de.
18Luku a pina di mi e pina nanga a benawtu ini san mi de,
gi mi pardon fu ala mi sondu.
19Luku fa den feyanti fu mi furu,
den wan kiri mi srefi fu di den no lobi mi srefsrefi.
20Kibri mi èn ferlusu mi,
no meki mi kon na syen,
bika na Yu mi e kibri.
21Mi e fertrow na Yu tapu èn mi e libi leki fa a fiti.
Kibri mi bika na tapu Yu mi e howpu.
22Tye Gado, ferlusu Israel fu ala en benawtu.
