Wan begi fu Gado ferlusu Israel
1Gi a tiriman fu a singigrupu fu a tempel. A mus singi a srefi fasi leki: Den leili. Wortu di mus memre wi na san Asaf ben taki. Wan psalm.
2Yu di e tiri Israel leki wan skapuman,
Yu di e tiri den bakapikin fu Yosef leki skapu,
arki wi!
Yu di e sidon tapu den kerub,
sori Yusrefi na ini wan krin faya.
3Meki a makti fu Yu de fu si,
gi Efraim, Benyamin nanga Manase.
Kon, kon ferlusu wi.
4Tye Gado, meki wi de baka leki fa wi ben de bifo,
luku wi nanga prisiri,
dan wi sabi taki Yu o ferlusu wi.
5MASRA, Gado fu ala sani,
olanga Yu ati o tan bron aladi Yu pipel e begi Yu?
6Yu meki furu nowtu miti wi,
meki wi dringi wi eigi watra-ai.
7Yu meki den kondre lontu wi e feti fu wi kondre,
den feyanti fu wi e teki wi meki spotu.
8Tye Gado fu ala sani,
meki wi de baka leki fa wi ben de bifo,
luku wi nanga prisiri,
dan wi sabi taki Yu o ferlusu wi.
9Yu diki wan pikin droifibon puru ini Egipte,
Yu yagi folku puru dan Yu prani en.
10Yu ben meki a gron klar'klari gi en,
fu a ben kan sutu rutu èn furu a kondre.
11A schaduw fu en ben e tapu den bergi
den taki fu en ben tapu den hei sedrebon
di ben e suku fu miti heimel.
12Den taki fu en ben bradi go te na a se,
den pransun fu en ben doro te na Eufratliba.
13Fu sanede Yu broko a skotu fu en?
Iniwan sma di e waka psa e broko den froktu fu en.
14Busi agu e betibeti a buba fu en,
den meti fu a wei e kon nyanyan den yongu taki fu en.
15Tye, Gado fu ala sani, drai kon baka,
luku fu heimel èn si,
luku san e miti a droifibon disi,
16a pransun di a let'anu fu Yu prani,
a manpikin di Yusrefi kweki.
17Den koti en trowe èn den bron en.
Den e dede gwe te Yu e luku den nanga atibron.
18Kibri a wan di Yu teki gi Yusrefi,
a pikin di Yusrefi kweki.
19Dan wi no sa gwe libi Yu,
meki wi tan na libi,
dan wi sa kari a nen fu Yu.
20MASRA, Gado fu ala sani,
meki wi de baka leki fa wi ben de bifo,
luku wi nanga prisiri,
dan wi sabi taki Yu o ferlusu wi.
