Paulus preiki fu Yesus Kristus di dede na a kroisi
1Brada nanga sisa, di mi kon na unu fu ferteri unu san Gado taki tak' A ben o du, mi no kon nanga moi wortu noso koni. 2Bika mi ben teki a besroiti fu no taki fu no wan tra sani, dan fu Yesus Kristus, èn tak' A dede na a kroisi. 3Di mi kon na unu, mi kon ini wan swakifasi, mi ben e frede, èn mi ben e beifi. 4Te mi ben e taki nanga unu, èn te mi ben e preiki, mi no ben e du en nanga hebi wortu fu sori bigi koni, ma mi ben du en ini a krakti fu a Yeye. 5Bika mi no ben wani taki un ben mus bow un bribi tapu a koni fu libisma, ma tapu a krakti fu Gado.
A Santa Yeye tyari san Gado wani sori wi kon na krin
6Te wi e taki nanga sma di lepi kba ini a bribi, wi e taki nanga koni. Ma dati no de wan koni fu grontapu. A no de wan koni tu fu den makti di e rigeri grontapu. Gado o puru den na pasi. 7A koni fu san wi e taki, na a koni fu Gado di ben kibri. No wan sma ben sabi en ete. Fosi Gado ben meki grontapu, A ben teki a besroiti kba taki a koni fu En o tyari glori kon gi unu. 8No wan fu den makti di e rigeri grontapu ben sabi fu en. Efu den ben sabi fu en, den no ben o spikri a Masra fu glori na a kroisi. 9Ma a de soleki fa a skrifi: “San no wan ai ben si, san no wan yesi ben yere, èn san noiti wan sma ben prakseri ete, na dati Gado ben besroiti fu du gi den sma di lobi En.”
