38Te wan man noso wan uma kisi lekti weti flaka tapu en skin, 39a priester sa abi fu luku den. Efu den weti flaka no e brenki ma den dungrudungru, dan na noti moro leki wan flaka nomo di de tapu a buba. Sowan sma krin ini Gado ai.
40Te a edewiwiri fu wan mansma e fadon, na piri en ede e piri. Sowan sma krin ini Gado ai. 41Efu na en fes'ede a wiwiri e fadon, dan na piri en fes'ede e piri. Sowan sma krin ini Gado ai. 42Ma efu wan rediredi weti flaka de fu si pe a wiwiri fadon na en mindri ede noso en fes'ede, dan na wan siki fu a skin broko na en mindri ede noso en fes'ede. 43A priester sa luku en. Efu a si taki na wan rediredi weti sweri de na a sma mindri ede pe a wiwiri fadon, noso na en fes'ede di piri èn a sweri gersi wan siki fu a skin, 44dan na wan siki fu a skin a sma abi. Sowan sma no krin ini Gado ai. A priester abi fu taigi en taki a no krin ini Gado ai. Na wan siki fu a skin broko na en ede.
45A sma di abi a siki mus priti en krosi. A mus libi en wiwiri meki a anga, nanga en anu a mus tapu en snor nanga en barba èn a mus bari: ‘Mi no krin! Mi no krin!’ 46Solanga leki a abi a siki fu en skin a e tan so taki a no krin ini Gado ai. A sa libi aparti. A no sa tan ini a kampu.
