1Ala sma mus saka densrefi gi lanti. Bika efu Gado no ben wani, dan lanti no ben o de. Èn den wan di de, na Gado poti den. 2So efu wan sma no e du san lanti taki, dan a e feti wan sani san Gado poti. Èn den sma di e du dati, e suku strafu gi densrefi. 3Efu wan sma e du bun a no abi fu frede lanti. Ma efu a e du ogri, dan a abi fu frede. So, efu yu wani libi sondro frede gi lanti, dan yu mus du bun, dan lanti o gi yu grani. 4Gado poti lanti leki wan dinari gi yu eigi bun. Ma efu yu e du sani san no bun, dan yu mus frede. Bika a no fu soso lanti abi a makti fu gi strafu. Gado poti lanti fu strafu den sma di e du ogri. 5Dat' meki a de fanowdu fu yu saka unsrefi. Yu no mus du en soso fu no kisi strafu, ma fu yu abi wan krin konsensi tu. 6Na fu dat'ede yu e pai lantimoni tu. Bika den man fu lanti e dini Gado te den e du san den mus du. 7So yu mus pai ala sma san den mus kisi. Pai lantimoni na a sma di mus kisi en, èn efu yu mus pai fu di yu tyari wan sani kmoto fu tra kondre, dan yu mus pai en. Sori lespeki na a sma di mus kisi lespeki, èn gi bigi nen na a sma di mus kisi bigi nen.
Tyari yusrefi soleki fa a fiti
8Un sorgu taki un no abi no wan paiman. A wan enkri paiman san un mus abi, na fu lobi makandra. Bika a sma di lobi trawan e du ala sani san a wèt taki. 9Bika ala den wèt soleki: “Yu no mus huru, yu no mus kiri, yu no mus fufuru, èn yu no mus abi bigi-ai,” nanga awinsi sortu tra wèt moro, yu kan tyari den alamala kon poti ondro a wan wèt di e taki: “Yu mus lobi tra sma soleki fa yu lobi yusrefi.” 10A sma di lobi trawan no e du trawan ogri. Dat' meki efu yu lobi trawan yu e du san a wèt taki.
