24Dan Yesus gi den ete wan agersitori. A taki: “Un kan si a fasi fa Gado e tiri libisma leki wan man di ben sai bun siri ini en gron. 25Ma di ala sma ben e sribi, a feyanti fu en kon sai grasi mindri a graan, dan a gwe. 26Leki fa a graan bigin gro èn a bigin gi nyanyan, so a grasi gro tu. 27Dan den knekti fu a man go aksi en taki: ‘Masra, a no bun siri yu ben sai ini yu gron? Pe a grasi kmopo dan?’ 28A man piki den taki: ‘Na wan feyanti du a sani dati.’ 29Dan den knekti aksi en taki: ‘San un mus du? Un mus hari a grasi puru?’ Ma a man taigi den taki: ‘No, bika te unu e hari a grasi, un kan hari a graan tu. 30Meki ala tu gro te leki a ten doro fu koti a graan. Dan mi o taigi den sma di o koti a graan fu puru a grasi fosi, tai en ini bosu, dan den bron en. Ma a graan den mus poti ini mi maksin.’ ”
Agersitori fu a tiri fu Gado
31Yesus gi den a agersitori disi tu. A taki: “Un kan si a fasi fa Gado e tiri libisma, leki wan mosterdsiri di wan sma prani ini en gron. 32A de a moro pikin siri san de, ma te a gro kon, a bigi moro ala den tra spesreibon di sma e prani. A e tron wan bon pe pikinfowru kan frei go meki den nesi.”
33A gi den wan tra agersitori taki: “Un kan si a fasi fa Gado e tiri libisma leki dyesi di wan uma teki poti ini bun furu blon. Dan a dyesi e meki ala a blon kon sweri.”
