44“Un kan si a fasi fa Gado e tiri libisma, leki wan gudu di beri ini wan gron. Wan man feni en, èn a beri en baka. A breiti sote taki a e go seri ala sani san a abi, èn a e bai a gron.
45Un kan si a fasi fa Gado e tiri libisma, leki wan man di e suku moi parelkrara fu bai. 46Di a feni wan san warti furu, a go seri ala sani san a abi, èn a bai en.
47Un kan si a fasi fa Gado e tiri libisma, leki wan fis'neti san den fringi go ini se, èn san e fanga ala sortu fisi. 48Te a furu, den e hari en kon na syoro. Dan den sma e sidon puru ala fisi di bun fu nyan, poti ini baskita. Ma den wan san no bun fu nyan, den e trowe. 49Na so a sa de na a kba fu a ten disi. Den engel sa go fu puru den sma di no e du Gado wani na mindri den sma di bun ini En ai. 50Dan den sa fringi den go ini a faya onfu, pe den sa krei èn kaw den tifi.”
51Dan Yesus aksi den man di ben e teki leri fu En taki: “Un ferstan ala den sani disi?” Den piki: “Iya, Masra.” 52Dan Yesus taigi den taki: “Ibri sabiman fu Gado wèt di e teki leri fu a fasi fa Gado e tiri libisma, de leki wan man di abi wan maksin fu pe a e tyari nyun sani nanga owru sani kon na doro.”
Den sma fu Nasaret no wani bribi ini Yesus
53Di Yesus kba taki den agersitori disi, A kmoto pe A ben de, 54dan A go na a foto pe A ben kweki. Drape A gi den sma leri ini a kerki fu den. Di den sma yere fa A e gi leri, den tnapu nanga opo mofo. Den taki: “Pe A feni a koni disi? Èn pe A feni a makti fu du den bigi sani? 55A p'pa fu En na a temreman. A m'ma fu En na Maria, èn den brada fu En na Yakobus, Yosef, Simon nanga Yudas. 56Ala den s'sa fu En e libi dya. Pe A kmopo nanga ala den sani disi dan?” 57Dat' meki den no ben wani yere noti fu En.
Ma Yesus taigi den taki: “Ala sma e lespeki wan profeiti, boiti den sma fu a foto pe a kweki nanga den ososma fu en.” 58So Yesus no du furu bigi sani drape, bika den sma no ben e bribi.