1MASRA, fu sanede Yu de so fara?
Fu sanede Yu e kibri now di wi de na ini problema?
2Den ogri-ati sma nanga a heimemre fu den,
de nomo na den mofinawan baka.
Meki densrefi fasi ini a ogri di den ben prakseri fu du.
3Bika ogri-ati sma e meki bigi fu den sani di den wani du.
Den di e meki moni tapu wan kruktu fasi tapu trawan,
e fluku èn afrontu MASRA.
4Nanga a heimemre fu den, den e prakseri na densrefi taki:
Gado no o aksi mi fu gi frantwortu.
Den no e prakseri Gado srefsrefi.
5A gersi leki ala san den e du e waka bun,
ma den no e ferstan srefsrefi fa Gado e krutu libisma.
Den e seki den ede te den e luku den feyanti fu den.
6Den e prakseri ini densrefi taki:
Mi no o fadon.
Ogri no o miti mi noiti.
7Fluku nanga bedrigi lai na ini den mofo,
èn den abi a gwenti tu fu e tapu skreki gi sma.
Soso ogri nanga pori e kmoto ini den mofo.
8Den e didon luru na tiri presi,
na kibripresi den e kiri sma di no du noti.
Den e luku den sma fin'fini di no man yepi densrefi.
9Den e luru leki wan lew ini bus'busi,
den e luru fu fanga den mofinawan,
den e fanga den nanga den net,
dan den e srepi den tyari gwe.
10Den e bukundu, den e saka sidon lagi,
èn den swakiwan no man du noti te den fadon ini anu fu den.
11Den e prakseri ini densrefi taki:
Gado no e luku srefi,
A e drai En fesi,
noiti A e luku.
12Du wan sani, MASRA,
strafu den mi Gado,
no fergiti den sma di trawan e pina.
13Fa ogri-ati sma kan afrontu Gado?
Fa den kan prakseri taki Gado no o kari den kon fu gi frantwortu?
14Ma Yu e si a pina nanga a sari,
Yu e si en èn Yu sabi fa a hebi.
Den swakiwan e bow na Yu tapu,
Yu na a Yepiman fu den pikin di no abi p'pa nanga m'ma moro.
15Broko a makti fu den ogri-ati sma,
strafu den fu a ogri di den e du,
te leki den no e du no wan ogri moro.
16MASRA na kownu fu têgo èn alaten:
Yu yagi den folku di no e dini Yu puru fu a kondre fu Yu.
17MASRA, Yu si a angri fu a ati fu den sma di trawan e si fu noti,
èn Yu piki den,
Yu e gi den dek'ati èn Yu e kaka Yu yesi fu arki den.
18Yu e meki taki den pikin di no abi p'pa nanga m'ma moro,
nanga den sma di trawan e pina,
kisi den leti.
Tapu a fasi dati sma no man yagi den puru moro fu a kondre.
