Disi na san a Wan e taki di e hori den seibi stari na ini En let'anu, èn di e waka mindri den seibi gowtu tiki di hori den olilampu: 2Mi sabi den sani san un e du, a muiti san un e meki, nanga a fasi fa un e hori doro. Mi sabi taki un no e koti nanga den sma di e du ogri. Un ben tesi den sma di e kari densrefi boskopuman fu Mi, ma un kon si taki den e lei. Den a no boskopuman fu Mi. 3Fu Mi ede un hori doro èn teki ala sortu pina, ma un no lasi ati. 4Ma san Mi no feni bun fu unu, na taki un lasi a fosi lobi san un ben abi gi Mi. 5Un mus prakseri o fara un ben de fosi un fadon. Dat' meki un mus drai un libi èn du den sani baka san un ben du fosi. Ma efu un no du dati, efu un no drai un libi, Mi o kon puru a tiki fu unu di hori den olilampu, na en presi. 6San Mi feni bun fu unu, na taki neleki Mi, un no lobi den sani kwet'kweti san den sma e du di e hori na a leri fu Nikolaus.
7Suma abi yesi, meki a yere san a Yeye e taigi den gemeente. A sma di e wini, Mi sa gi fu nyan fu a bon san e gi libi di de ini a paradeis fu Gado.”
