Surinaams Bijbelgenootschap

Is hij soms op reis gegaan?

Bijbeltekst(en)

16Dan Obadya go suku Akab èn a gi en a boskopu. Ne Akab go na Elia. 17Fa Akab si Elia na so a taigi en taki: “Na yu Elia, yu di meki a ongoloku disi miti Israel.” 18Ma Elia piki en taki: “A no mi, ma na yu nanga den famiri fu yu p'pa meki a ongoloku disi miti Israel. Bika un poti den gebod fu MASRA na wan sei èn go dini Baal. 19Meki heri Israel kon na mi tapu a Karmelbergi, makandra nanga den fo hondro feifitenti profeiti fu Baal, nanga den fo hondro profeiti fu Asyera, gi san Isebel e sorgu.”

20Dan Akab seni a boskopu gi ala sma ini Israel nanga gi den profeiti fu kon na wan na a bergi Karmel. 21Elia waka go na a pipel di ben kon makandra drape dan a aksi den taki: “Olanga a o tan fosi un teki wan besroiti? Efu na MASRA na a tru Gado, dan un waka na MASRA baka. Ma efu na Baal, dan un waka na Baal baka.” Den sma no piki noti. 22Elia taigi den moro fara taki: “Na mi wawan tan ete fu den profeiti fu MASRA, ma Baal abi fo hondro feifitenti profeiti. 23Un tyari tu yongu bulu kon. Meki den teki sortu wan den wani. Meki den koti en pis'pisi poti tapu udu. Ma den no mus leti faya gi a udu. Mi o du a srefi sani nanga a tra bulu ma mi no o poti faya gi a udu tu. 24Te den du dati, den mus begi a gado fu den èn mi o begi MASRA. A gado di piki nanga faya na a tru Gado.” Ala den sma ben agri nanga dati.

25Dan Elia taigi den profeiti fu Baal taki: “Un fosi teki sortu wan fu den bulu un wani dan un seti en poti, bika un de nanga furu sma. Un begi a gado fu unu, ma un no mus leti faya gi en.” 26Den profeiti fu Baal teki wan fu den tu bulu, den seti en poti dan den begi Baal fu mamanten te leki bakadina. Den ben e taki: “Baal, piki wi.” Ma noti no ben de fu yere èn no wan sma ben e piki den awinsi fa den ben e dyompo lontu a altari di den ben meki. 27Brekten yuru, Elia bigin meki spotu nanga den. A taigi den taki: “Un begi moro tranga, bika en na wan gado. Kande a e prakseri wan sani, kande a wan de en wawan gi wan pisten noso kande a go na waka. Kande un mus wiki en fu di a e sribi.” 28Dan den man bigin begi bun tranga èn soleki fa den ben gwenti, den bigin koti densrefi nanga nefi nanga lansri te leki brudu bigin lon na den skin. 29Te fu kba, den no ben sabi noti moro fu densrefi, te leki dri yuru bakadina. Ma noti no ben de fu yere, no wan sma ben e piki den, noti no ben sori taki wan sma e arki den.

1 Kownu 18:16-29STB16In Bijbellezer openen

Contact

Surinaams Bijbelgenootschap

Henck Arronstraat 39

Paramaribo

Suriname

Telefoon: (+597) 47 43 38 / (+597) 47 85 07

Whatsapp: (+597) 88 46 993

E-mail: info@surinamebiblesoc.org

Download onze app
Surinaams Bijbelgenootschapv.4.21.9
Volg ons