1 Kownu 18

₁Baka wan pisten, di alen no ben fadon dri yari kba, MASRA taigi Elia taki: “Go na Akab, bika Mi wani meki alen fadon baka.” ₂So Elia go na Akab. A pisten dati a angriten ben de so hebi ini Samaria, ₃taki Akab ben seni kari Obadya, a edeman fu den knekti fu kownu. Obadya ben abi dipi lespeki gi MASRA. ₄Di Isebel ben e kiri den profeiti fu MASRA, Obadya ben tyari wan hondro fu den go kibri ini den bergi-olo. A meki tu grupu fu feifitenti, dan a ben e gi den nyanyan nanga dringi. ₅Na a Obadya disi, Akab taigi taki: “Psa na ala den watrabron, nanga ala den kriki fu a kondre. Kande wi kan feni grasi fu hori den asi nanga den buriki na libi. Noso wi o abi fu kiri wantu fu den.” ₆Ibriwan fu den teki wan pisi fu a kondre fu go suku. Akab teki go na a wan sei, Obadya go na a tra sei.

₇Ma di Obadya ben de ondro pasi a miti nanga Elia. Di a si tak' na Elia, a trowe ensrefi na gron èn a taki: “Na yu trutru, mi masra Elia.” Elia piki en taki: “Iya, na mi. ₈Go taigi yu kownu taki: ‘Elia de dyaso.’ ” ₉Ma Obadya aksi en taki: “San mi du yu taki yu e gi mi abra na Akab fu a kiri mi? ₁₀Mi e sweri gi yu na a libilibi MASRA, a Gado fu yu, dati no wan folku noso kondre no de pe kownu no seni suku yu. Efu den ben taki tak' yu no drape, kownu ben e meki a folku noso a kondre dati sweri taki den no ben man feni yu. ₁₁Dan fa yu kan taigi mi fu go taigi kownu taki Elia de dyaso? ₁₂Te mi e go fu go taigi en, a kan taki wan yeye fu MASRA teki yu tyari go na wan presi di mi no sabi. Dan te Akab kon èn a no feni yu, a o kiri mi di e lespeki MASRA sensi di mi yongu. ₁₃Yu no yere san mi du di Isebel ben e kiri den profeiti fu MASRA? Mi teki wan hondro profeiti, tu grupu fu feifitenti, tyari go kibri ini bergi-olo, èn mi sorgu gi nyanyan nanga dringi gi den. ₁₄Dan fa yu kan seni mi fu go taigi kownu taki Elia de dyaso? Na kiri a o kiri mi.” ₁₅Ma Elia piki en taki: “Mi e sweri gi yu na MASRA fu ala sani, di mi e dini, tide ete mi nanga Akab o miti.”

₁₆Dan Obadya go suku Akab èn a gi en a boskopu. Ne Akab go na Elia. ₁₇Fa Akab si Elia na so a taigi en taki: “Na yu Elia, yu di meki a ongoloku disi miti Israel.” ₁₈Ma Elia piki en taki: “A no mi, ma na yu nanga den famiri fu yu p'pa meki a ongoloku disi miti Israel. Bika un poti den gebod fu MASRA na wan sei èn go dini Baal. ₁₉Meki heri Israel kon na mi tapu a Karmelbergi, makandra nanga den fo hondro feifitenti profeiti fu Baal, nanga den fo hondro profeiti fu Asyera, gi san Isebel e sorgu.”

₂₀Dan Akab seni a boskopu gi ala sma ini Israel nanga gi den profeiti fu kon na wan na a bergi Karmel. ₂₁Elia waka go na a pipel di ben kon makandra drape dan a aksi den taki: “Olanga a o tan fosi un teki wan besroiti? Efu na MASRA na a tru Gado, dan un waka na MASRA baka. Ma efu na Baal, dan un waka na Baal baka.” Den sma no piki noti. ₂₂Elia taigi den moro fara taki: “Na mi wawan tan ete fu den profeiti fu MASRA, ma Baal abi fo hondro feifitenti profeiti. ₂₃Un tyari tu yongu bulu kon. Meki den teki sortu wan den wani. Meki den koti en pis'pisi poti tapu udu. Ma den no mus leti faya gi a udu. Mi o du a srefi sani nanga a tra bulu ma mi no o poti faya gi a udu tu. ₂₄Te den du dati, den mus begi a gado fu den èn mi o begi MASRA. A gado di piki nanga faya na a tru Gado.” Ala den sma ben agri nanga dati.

₂₅Dan Elia taigi den profeiti fu Baal taki: “Un fosi teki sortu wan fu den bulu un wani dan un seti en poti, bika un de nanga furu sma. Un begi a gado fu unu, ma un no mus leti faya gi en.” ₂₆Den profeiti fu Baal teki wan fu den tu bulu, den seti en poti dan den begi Baal fu mamanten te leki bakadina. Den ben e taki: “Baal, piki wi.” Ma noti no ben de fu yere èn no wan sma ben e piki den awinsi fa den ben e dyompo lontu a altari di den ben meki. ₂₇Brekten yuru, Elia bigin meki spotu nanga den. A taigi den taki: “Un begi moro tranga, bika en na wan gado. Kande a e prakseri wan sani, kande a wan de en wawan gi wan pisten noso kande a go na waka. Kande un mus wiki en fu di a e sribi.” ₂₈Dan den man bigin begi bun tranga èn soleki fa den ben gwenti, den bigin koti densrefi nanga nefi nanga lansri te leki brudu bigin lon na den skin. ₂₉Te fu kba, den no ben sabi noti moro fu densrefi, te leki dri yuru bakadina. Ma noti no ben de fu yere, no wan sma ben e piki den, noti no ben sori taki wan sma e arki den.

₃₀Ne Elia taigi ala den sma di ben drape taki: “Un kon krosbei.” Di den sma kon moro krosbei, Elia bigin meki a altari fu MASRA baka di ben broko fadon. ₃₁A teki twarfu ston, wan gi iniwan fu den lo, den bakapikin fu den manpikin fu Yakob, a man di MASRA ben taigi taki: “Yu sa nen Israel.” ₃₂Nanga den twarfu ston dati, a bow wan altari gi MASRA. Dan a diki wan gotro fu fotenti meter lontu a altari. ₃₃Baka dati, a seti a udu poti tapu a altari, a koti a bulu pis'pisi èn a poti den pisi tapu a udu. ₃₄Dan a komanderi den sma taki: “Un span fo kroiki nanga watra, dan un kanti en tapu a ofrandi nanga a udu.” Di den du en a taigi den fu a di fu tu leisi taki: “Du en ete wan leisi.” Baka dati a taigi den fu du en fu a di fu dri leisi. ₃₅A watra ben e lon fu a altari taki a ben furu a gotro srefi nanga watra. ₃₆Dan tapu a yuru pe sma e tyari a ofrandi fu neti, profeiti Elia waka pikinso go na fesi dan a begi taki: “MASRA, Gado fu Abraham, Isaak nanga Yakob, sori tide taki Yu wawan na Gado ini Israel, èn taki mi na a knekti fu Yu di Yu komanderi fu du ala den sani disi. ₃₇Piki, MASRA, piki! Meki a pipel disi si taki Yu na a tru Gado èn taki na Yu e drai den ati kon baka na Yu.” ₃₈Ne a faya fu MASRA sutu kon na gron. A bron a ofrandi, a udu, den ston nanga a santi. Srefi a watra ini a gotro drei gwe. ₃₉Di a pipel si san psa, den trowe densrefi na gron èn den bari taki: “MASRA wawan na Gado, MASRA wawan na Gado.”

₄₀Dan Elia komanderi a pipel taki: “Un grabu den profeiti fu Baal, no wan no mus lowe.” Di den grabu den, Elia meki a pipel tyari den profeiti go kiri na a Kisonkriki.

₄₁Baka dati, Elia taigi Akab taki: “Go nyan èn go dringi bika mi e yere fa wan tranga alen e kon kba.” ₄₂Dan Akab gwe fu go nyan nanga dringi. Ma Elia kren go moro hei tapu a Karmelbergi. Drape a boigi nanga en ede mindri en kindi. ₄₃Dan a komanderi a knekti fu en fu kren go moro na loktu èn fu luku go na se. A knekti kren go, a luku dan a taigi Elia taki: “Noti no de fu si.” Ma Elia seni en seibi leisi go baka. ₄₄A di fu seibi leisi, a knekti taigi en taki: “Mi e si wan pikin wolku e opo fu a se, a pikin leki wan libisma anu.” Elia piki en taki: “Go taigi Akab fu a seti en fetiwagi dan a saka kmoto fu a bergi fosi a bigi alen tapu en.” ₄₅A no teki langa di dungru wolku ben de fu si na loktu, winti bigin wai èn hebi alen bigin fadon. Akab kren ini en wagi dan a go na Yisreel. ₄₆Ma MASRA gi Elia spesrutu krakti. A hari en krosi go na loktu dan a lon go te pe a bigi pasi fu Yisreel e bigin fosi a wagi fu Akab ben doro drape.