A bun di de fu kon
1A Yeye fu Masra MASRA de na mi tapu,
bika MASRA salfu mi.
A seni mi fu tyari bun nyunsu gi den pôtiwan,
fu gi den wan di lasi ati howpu baka,
fu taigi den sma di de na strafu taki den o lusu,
fu fri den di de na strafu,
2fu bari wroko tak' a yari doro pe MASRA o du den bun,
nanga wan dei pe A o pai den feyanti baka.
A seni mi tu fu trowstu ala sma di e sari,
3èn fu gi den sma fu Sion di e sari
wan kroon tapu den ede prefu asisi,
prisiri prefu brokofasi.
Sma sa kari den:
Bigi bon di bun ini Gado ai,
a bon di MASRA srefi prani fu gi En grani.
4Den presi di ben didon brokobroko na gron bun langa kba,
den o bow baka,
èn den presi di feyanti ben broko olanga kba,
den o meki baka.
Den o meki foto baka di ben didon leki bigi ipi broko ston,
foto di feyanti ben broko bun langa kba.
5Doroseisma sa tnapu e wei den meti fu yu,
tra folku sa wroko den pranigron nanga den droifidyari fu yu.
6Ma unu den o kari: priester fu MASRA.
Den o gi unu a nen fu: knekti fu a Gado fu unu.
Un o prisiri nanga den gudu fu den dorosei folku,
èn un o prodo nanga den.
7Un o kisi wan dobru paiman fu a syen di un nyan.
Den o prisiri fu san den o kisi fu a afrontu di den nyan.
Dat' meki den o kisi wan dobru pisi,
èn a prisiri di den o prisiri o de fu têgo.
8Bika Mi, MASRA, lobi te sani e du tapu wan leti fasi.
ma Mi no lobi srefsrefi te sma e fufuru trawan,
nanga te sma e du trawan ogri.
Mi o pai den baka leki fa Mi pramisi,
èn meki wan têgo ferbontu nanga den.
9Ala folku sa sabi den pikin fu den,
èn ala kondre sa sabi den bakapikin fu den.
Ala sma di o si den o taki tak' den na sma di MASRA blesi.
10Mi sa prisiri srefsrefi fu MASRA ede,
mi sili sa firi switi ini a Gado fu mi.
Bika A weri wan krosi fu ferlusu gi mi,
A poti wan langa dyakti na mi skowru fu sori taki mi bun ini En ai,
Leki fa wan trowmasra e poti wan kroon tapu en ede.
èn leki fa wan trowmisi e weri den moi sani fu en.
11Bika leki fa a gron e pusu den pransun fu en kon na loktu,
èn leki fa wan bromkidyari e meki den siri fu en opo,
na so Masra MASRA sa meki a fasi fu du sani nanga leti,
nanga grani
gro kon na loktu meki ala folku si.
