Wan begi fu gi Gado grani baka tranga ten
1Gi a tiriman fu a singigrupu fu a tempel. A mus singi a srefi fasi leki: No meki mi go lasi. Fu David. Wan begi, di a ben go kibri gi Saul ini a bergi-olo.
2Sori mi Yu bun-ati, mi Gado,
sori mi Yu bun-ati
bika na Yu mi e kibri.
Iya, na ini a schaduw fu den frei fu Yu mi sa kibri,
te leki a bigi ogri psa.
3Na Gado mi e kari, a Moro Hei Gado,
na Gado, di e tyari ala sani kon na wan kba gi mi.
4Fu heimel A e seni ferlusu gi mi,
A meki den sma di de na mi baka kon na syen. sela
Iya, Gado sa sori mi En bigi lobi èn taki A de fu fertrow.
5Na mindri lew mi didon,
mindri meti di e swari libisma,
den tifi fu den de leki lansri nanga peiri,
den tongo fu den na srapu nefi.
6Tye Gado, sori a makti nanga a glori fu Yu,
sori en na heimel nanga grontapu.
7Den ben seti wan ogri tapu mi pasi fu miti mi,
mi ben lasi ala howpu.
Den ben diki wan olo fu mi fadon na ini,
ma na densrefi fadon na ini. sela
8Mi ati sidon, tye mi Gado, mi ati sidon.
Mi wani singi, iya, singi wan singi.
9Meki yusrefi klari, mi sili,
meki yusrefi klari nanga harp nanga citer,
mi wani wiki fosi dei broko.
10Mi o prijse Yu, Masra, na mindri fu den folku,
singi gi Yu, meki ala kondre yere.
11MASRA, a lobi fu Yu bigi moro leki wi kan ferstan,
a bow di sma kan bow na Yu tapu no de fu marki.
12Mi Gado, sori a makti nanga a glori fu Yu,
sori en na heimel nanga tapu heri grontapu.
