Ini a mun Kislew, ini a di fu tutenti yari, mi ben e wroko ini a tranga foto Susan. 2Dan Hanani, wan fu den brada fu mi, kon luku mi. Makandra nanga wantu tra man a ben kmoto fu Yuda. Mi aksi den fa fu den sma fu Yuda di ben kmoto fu a kondre pe den ben de strafuman, èn fa a de nanga Yerusalem. 3Den taigi mi taki: “Den sma fu Yuda di ben kmoto libilibi fu a kondre pe den ben de strafuman, èn di e libi baka ini Yuda, de ini bigi nowtu èn sma e teki den e meki spotu. A skotu fu Yerusalem dati broko fadon èn den bigi doro fu a foto bron.”
4Di mi yere den sani dati, mi saka sidon èn mi bigin krei. Wantu dei langa mi sari sote, mi faste èn mi begi a Gado fu heimel, 5taki: “O MASRA, Gado fu heimel, Yu bigi sote èn Yu de fu frede. Yu e hori Yu na Yu ferbontu èn Yu e tan lobi den sma di lobi Yu èn di e hori den gebod fu Yu. 6Tangitangi, teki ten fu arki, èn luku fa Yu knekti e begi dei nanga neti gi den knekti fu Yu, den Israelitisma. Mi e taigi Yu tak' wi Israelitisma, sondu na Yu fesi; owktu mi nanga mi famiri sondu. 7Wi sondu hebi na Yu fesi, fu di wi no hori wi na den gebod, den sani di wi mus tan du nanga den sani na san wi ben mus tan hori wisrefi. Na Yu ben gi yu knekti Moses den sani disi. 8Ma MASRA, memre tak' Yu ben taigi Yu knekti Moses taki: ‘Efu un drai un baka gi Mi, Mi o panya un go mindri den tra folku. 9Ma efu un drai kon baka na Mi èn hori den gebod fu Mi, Mi o tyari un kon baka awinsi o fara un ben de. Mi o tyari un kon na a presi di Mi ben teki leki a presi pe sma mus gi Mi nen grani.’ 10MASRA, den Israelitisma na den knekti fu Yu, den na Yu pipel. Yu ben ferlusu den nanga a bigi krakti èn tranga anu fu Yu. 11Tye MASRA, tangitangi, poti yesi arki mi begi, nanga den begi fu den di e dini Yu nanga prisiri. Meki sani waka bun gi mi tide, èn meki a kownu du mi wan bun.” Na mi ben e kanti win gi kownu a pisten dati.
