Luister en kom tot geloof

₁₄Ma fa den sa kari En nen efu den no e bribi ini En? Èn fa den sa bribi ini En efu noiti den no yere fu En? Èn fa den sa yere fu En efu no wan sma go preiki gi den? ₁₅Èn fa sma kan go preiki gi den, efu wan sma no seni den? A de soleki fa a skrifi taki: “A switi fu yere te sma e waka kon di e tyari bun nyunsu.” ₁₆Ma a no ala sma bribi a bun nyunsu, bika Yesaya taki: “Masra, suma bribi a boskopu san wi ben tyari kon?” ₁₇Na so bribi e kon te un e yere a boskopu, èn a boskopu na a wortu fu Kristus. ₁₈Ma mi wani aksi wan sani: Na yere den Dyusma no yere a boskopu? Fu tru den yere a boskopu. Bika a skrifi taki: “A boskopu fu den panya na heri grontapu, èn ala sei fu grontapu den wortu fu den de fu yere.” ₁₉Dan mi wani aksi ete wani sani: Na ferstan den sma fu Israel no ferstan a boskopu? Na a fosi presi Moses taki: “Mi o meki un dyarusu tapu den sma di yu no man kari wan folku, èn Mi o meki un ati bron tapu wan folku di no abi ferstan.” ₂₀Èn Yesaya ben abi a dek'ati fu taki: “Mi meki sma di no ben suku Mi feni Mi. Èn Mi sori Misrefi na sma di no ben aksi fu Mi.” ₂₁Ma fu Israel a taki: “Heri dei Mi e langa Mi anu gi wan folku di trangayesi, èn di lobi fu hari taki.”