1MASRA taigi Moses nanga Aaron taki: 2“Te wan sma abi wan sweri, wan soro noso wan lekti flaka na en skin di wani gersi wan siki fu a skin, den sa tyari en go na priester Aaron noso wan fu den manpikin fu en, sobun den priester. 3A priester sa luku a presi pe a flaka de. Efu a si taki a wiwiri tapu a presi dati kon weti èn taki a presi dati didon moro dipi leki a tra buba fu a skin, dan na wan siki fu a skin a sma abi. Te a priester si dati a sa taki tak' a sma dati no krin ini Gado ai.
4Efu a sma abi wan weti flaka na en skin, ma a presi fu a flaka no didon moro dipi leki a tra buba fu a skin èn a wiwiri tapu a presi dati no weti tu, a priester sa tapu a sma dati poti seibi na wan presi. 5Tapu a di fu seibi dei a priester sa luku a flaka baka. Efu a priester luku èn a si taki a flaka tan a srefi èn taki a no panya moro fara, a sa tapu a sma dati ete seibi dei. 6Baka den seibi dei dati a priester sa luku a flaka baka. Efu a si taki a flaka e kon dungru èn taki a no panya ensrefi go moro fara, a priester sa taki tak' a sma dati krin ini Gado ai. A no ben de noti moro leki wan flaka. A sma sa wasi en krosi, dan a krin ini Gado ai baka. 7Ma efu a flaka panya ensrefi go moro fara, baka di a sma ben go na a priester fu a priester luku gi en efu a krin ini Gado ai, a sa abi fu go baka na a priester. 8Efu a priester luku a flaka èn a si taki a flaka panya ensrefi moro fara, a sa taigi a sma taki a no krin ini Gado ai. Na wan siki fu a skin a abi.
9Efu wan siki broko na wan sma skin, den sa tyari a sma dati go na a priester. 10Efu a priester luku èn a si taki a sma abi wan sweri na en skin di weti, taki a wiwiri srefi kon weti tu èn taki grometi e gro tapu a sweri, 11dan a priester no abi fu poti sowan sma aparti moro bika a de krin fu si taki na wan siki fu a skin a abi. A sma no krin ini Gado ai.
