12Efu a priester si, so fara leki a kan si, taki a siki broko na a sma heri skin, fu en ede kon miti en futu, 13a sa ondrosuku a sma moro fini. Efu a de so taki a siki broko trutru na a sma heri skin, a priester sa taigi a sma taki a krin ini Gado ai. So wan sma krin ini Gado ai, fu di en heri skin kon weti. 14Ma efu grometi de fu si, dan sowan sma no krin ini Gado ai. 15Efu a priester si taki grometi de, a sa taigi a sma taki a no krin ini Gado ai. Bika a grometi no krin. Na wan siki fu a skin a sma abi. 16Ma te a grometi kon weti, a sma sa go baka na a priester. 17A priester sa luku èn efu a si taki a grometi kon weti, a sa taigi a sma taki a kon krin ini Gado ai. Sowan sma krin ini Gado ai.
18Efu wan sma ben abi wan butsweri na en skin di kon betre, 19ma dan wan weti sweri broko tapu a presi dati, noso wan rediredi weti flaka, a sma sa go na a priester fu a priester luku en. 20Efu a priester luku a sweri èn a si taki a didon moro dipi leki a tra buba fu a skin, èn taki a wiwiri tapu a sweri kon weti, a sa taigi a sma taki a no krin ini Gado ai. Na wan siki fu a skin broko ini a sweri. 21Ma efu a priester luku èn a si taki a wiwiri tapu a sweri no weti, taki a no didon moro dipi leki a tra buba fu a skin èn taki a skin e kon dungru, a priester sa tapu a sma dati poti seibi na wan presi. 22Efu ini den seibi dei dati a sweri panya moro fara abra a skin, dan a priester sa taigi a sma taki a no krin ini Gado ai. Na wan siki fu a skin a abi. 23Ma efu ini den seibi dei a flaka tan a srefi èn a no panya moro fara, dan a ben de noti moro leki a marki fu a soro. A priester sa taigi a sma taki a krin ini Gado ai.
