A santa kisi e tyari bruya nanga dede gi den Filistijnsma
1Den Filistijnsma ben tyari a santa kisi fu Gado, di den ben teki na Eben-Haeser, go na a foto Asdod. 2Den Filistijnsma fu a foto dati tyari a santa kisi fu Gado go ini a tempel fu Dagon, a gado fu den, dan den poti en sei Dagon. 3Ma di den sma fu Asdod opo frukufruku a tamara mamanten, den si tak' Dagon ben fadon nanga en fesi na gron fesi a santa kisi fu MASRA. Ne den opo en poti baka na en presi. 4Ma di den opo frukufruku a tamara fu en, Dagon ben fadon baka nanga en fesi na gron fesi a santa kisi fu MASRA. Ma disi leisi a ede nanga den anu fu Dagon ben kapu puru èn den ben didon na mofodoro. Soso a tra pisi fu a skin ben tan. 5Na dat' meki te tide den priester fu Dagon nanga den sma di e go ini a tempel fu Dagon ini Asdod, e abra a pisi dati fu a doromofo.
6MASRA ben e strafu den sma fu Asdod hebi. A ben tyari bigi bruya na den mindri. A ben naki den sma fu Asdod nanga a kontren lontu a foto nanga butsweri. 7Di den man fu Asdod si fa sani ben e waka, den taki: “A santa kisi fu a Gado fu Israel no mus tan moro langa na wi. Bika a Gado fu Israel e strafu wi nanga wi gado Dagon, hebi.” 8Ne den seni kari ala den tiriman fu den foto fu den Filistijnsma kon na wan. Dan den aksi taki: “San wi mus du nanga a santa kisi fu a Gado fu Israel?” Den tiriman piki den taki: “A mus go na a foto Gat.” Dan so den tyari a santa kisi fu a Gado fu Israel go na Gat. 9Ma di den tyari a kisi go drape, MASRA strafu a foto dati tu. Bigi bruya ben kon drape tu fu di MASRA ben naki bigiwan nanga pikinwan fu a foto nanga butsweri. 10Ne den seni a santa kisi fu Gado go na a foto Ekron. Ma a srefi momenti di a kisi doro drape, den sma fu a foto dati bari taki: “Den tyari a santa kisi fu a Gado fu Israel kon dyaso fu kiri un alamala!” 11Dat' meki den kari ala den tiriman fu den foto fu den Filistijnsma kon baka na wan dan den taki: “Un mus seni a santa kisi fu a Gado fu Israel go baka na en tanpresi, noso a o kiri wi alamala.” Den taki so fu di ala den sma fu a foto ben de ini bigi benawtu, bika Gado ben e strafu den hebi. 12Den sma di no ben dede, ben e kisi wan lo butsweri. Fu fara yu ben e yere fa den ben e bari fu skin-ati.
