10Doroseisma o meki den skotu fu yu,
èn den kownu fu den o dini yu.
Bika ini Mi atibron Mi ben naki yu,
ma ini Mi bunfasi Mi sorgu gi yu baka.
11Den bigi doro fu yu sa tan opo.
Deiten den no o sroto, neti den no o sroto,
fu den folku tyari den gudu fu den kon gi yu,
makandra nanga den kownu fu den.
12Bika a folku nanga a kondre di no wani dini yu,
o broko.
Den o tron broko pranasi.
13Den moro moi udu fu a busi fu Libanon den o tyari kon gi yu:
udu fu a sipresbon,
fu a plataanbon nanga fu a dennebon.
Den o tyari den kon fu moi a santa presi fu Mi.
Sma o gi a presi pe Mi e sidon grani baka.
14Den manpikin fu den di ben pina yu,
o kon na yu èn den o boigi dipi gi yu.
Ala den wan di ben si yu leki noti o kon na yu,
dan den o kindi na yu futu.
Èn den o kari yu: Foto fu MASRA,
Sion fu a Santa Wan fu Israel.
15Awinsi sma ben gwe libi yu,
awinsi den no ben lobi yu srefsrefi,
awinsi no wan sma ben hari psa moro ini yu,
Mi e poti yu fu têgo leki wan tumsi moi presi,
leki wan presi di de wan prisiri gi sma fu ala ten.
16Yu o hari a gudu fu den folku kon na yu,
leki fa wan pikin e hari a bobi fu en m'ma.
Iya, yu o hari a gudu fu kownu kon,
dan yu sa sabi taki Mi, MASRA,
na yu Yepiman, yu Ferlusuman
a Tranga Gado fu Yakob.
17Prefu kopro mi e tyari gowtu,
prefu isri mi e tyari solfru,
prefu udu mi e tyari kopro,
èn prefu ston mi e tyari isri.
Freide nanga du sani tapu wan leti fasi,
o de den wan di e tiri yu.
18Sma no o yere moro fu bigi ogri di e psa ini yu kondre,
noso fu bigi feti ini a kontren fu yu di e pori èn di e broko sani.
Yu o kari den skotu fu yu: Ferlusu,
den bigi doro fu yu: Grani.
19Te deiten yu no sa abi a faya fu a son fanowdu moro,
nanga a leti fu a munkenki te neti.
Bika na MASRA o de leki wan têgo faya gi yu,
na a Gado fu yu o brenki gi yu.
20A son fu yu no o saka moro,
èn a munkenki fu yu no o dungru moro.
Bika MASRA o de wan têgo faya fu yu,
èn wan kba kon na a ten di yu ben e sari.
21A heri folku sa de sma di bun ini Gado ai.
A kondre o de fu den fu têgo.
Den o de den fosi pransun fu san Mi prani,
a wroko fu Mi anu,
fu Mi kisi grani.
22A pikinwan o tron wan lo,
a moro pikinwan wan makti folku.
Mi, MASRA o du disi es'esi te a ten fu en doro.
