Het begin van de weeën

₁Baka di Yesus kba taki ala den sani disi, A kmoto ini a tempel. Di A e gwe, den man di ben e teki leri fu En bigin sori En tapu den bigi oso di ben de ini a dyari fu a tempel. ₂Ne Yesus taigi den taki: “Un e si ala den sani disi? Fu tru Mi e taigi un taki: Den alamala o broko te na gron. No wan ston o tan na tapu wan trawan.”

₃Baka dati Yesus ben sidon tapu a Oleifbergi, dan den man di ben e teki leri fu En kon den wawan na En. Den aksi En taki: “Masra, taigi unu: Oten a sani dati o psa? San o de a marki di o sori taki Yu e kon baka, èn taki a kba fu a ten disi doro?” ₄Yesus piki den taki: “Un mus luku bun taki no wan sma no kori unu! ₅Bika furu sma o du leki den na Mi. Den o taki tak' den na a Mesias, èn den o kori furu sma. ₆Un o yere tak' kondre e feti nanga densrefi èn taki bigi feti de fu broko, ma un no mus skreki, bika den sani disi mus fu psa. Ma dati a no a kba ete. ₇Bika a wan folku o feti nanga a tra folku, èn a wan kondre o feti nanga a trawan. Na difrenti presi angriten o de èn a gron o seki hebi tu. ₈Ma ala den sani disi na soso a bigin fu a tranga ten di o kon. ₉Den o grabu unu, dan den o gi un abra na sma di o pina unu, èn di o kiri unu. Fu Mi ede no wan sma fu no wan folku o man si un na ai. ₁₀Ini a ten dati furu sma o lasi bribi ini Mi, a wan sma o tyari a trawan gi lanti èn den no o man si makandra na ai. ₁₁Furu sma o du leki den na profeiti èn den o kori furu sma. ₁₂Libisma o kon takru sote taki furu sma no sa lobi trawan moro. ₁₃Ma Gado sa ferlusu a sma di sa hori doro te na a kba. ₁₄A bun nyunsu disi taki Gado bigin tiri libisma, sa panya na heri grontapu fu ala folku kan kisi a okasi fu yere en. Dan fosi grontapu o kba.”