34Di den Fariseiman yere taki Yesus tapu a mofo fu den Saduseiman, den kon makandra. 35Dan wan fu den di ben sabi a wèt bun, kon na Yesus fu tesi En. A aksi En taki: 36“Meister, sortu wan fu den wèt na a moro prenspari wan?” 37Yesus piki en taki: “Yu mus lobi Masra, yu Gado, nanga yu heri ati, nanga yu heri sili, èn nanga yu heri ferstan. 38A dati na a fosi wèt èn na a moro prenspari wan. 39Ma wan trawan de di prenspari leki a fosiwan. A dati e taki: Yu mus lobi tra sma soleki fa yu lobi yusrefi. 40Ala sani san Moses nanga den profeiti leri unu, de ini den tu wèt disi.”
Suma na a Mesias?
41Di den Fariseiman ben de makandra, Yesus aksi den taki: 42“San un e prakseri fu a Mesias? Suma pikin A de?” Den Fariseiman piki taki: “A de wan bakapikin fu David.” 43Yesus taigi den taki: “Dan fa a Santa Yeye kan meki David kari En ‘Masra’? 44Bika David ben taki: ‘Masra Gado taigi mi Masra taki: Kon sidon na Mi let'anu sei, te leki Mi poti den feyanti fu Yu ondro Yu futu.’ ” 45We, efu David kari a Mesias, Masra, dan fa A kan de en bakapikin dan? 46No wan sma ben man piki En tapu a aksi disi. Èn sensi a dei dati no wan sma ben prefuru fu aksi En wan sani baka.
