8Yoyakin ben abi tin-na-aiti yari di a tron kownu. A tan dri mun na makti ini Yerusalem. En m'ma ben nen Nekusta, èn a ben de wan umapikin fu Elnatan fu Yerusalem. 9Yoyakin ben e du san no bun ini MASRA ai, neleki en p'pa.
10Di Yoyakin ben de na makti, den ofisiri fu kownu Nebukadnesar fu Babel, hari go feti nanga Yerusalem dan den lontu a foto fu alasei. 11Kownu Nebukadnesar fu Babel srefi kon drape di den srudati fu en ben lontu a foto. 12Dan kownu Yoyakin fu Yuda gi ensrefi abra na a kownu fu Babel makandra nanga en m'ma, den knekti fu en, den ofisiri fu en nanga den heihei man fu a kownu-oso. Kownu Nebukadnesar ben de aiti yari na makti di a teki Yoyakin tyari gwe. 13Nebukadnesar teki ala den gudu fu a oso fu MASRA nanga di fu a kownu-oso tyari gwe. A puru a gowtu teki tu fu ala den sani di kownu Salomo fu Israel ben meki gi a tempel fu MASRA, soleki fa MASRA ben taki na fesi kba tak' dati ben o psa. 14Ala den sma fu Yerusalem a teki tyari gwe nanga tranga, ala den ofisiri nanga ala den man di ben fiti fu feti ini a legre, tin dusun sma. A teki ala den temreman tyari gwe tu nanga den smeti. Soso den moro pôti sma fu a kondre a libi na baka. 15Nebukadnesar tyari Yoyakin nanga tranga go na Babel, makandra nanga en m'ma, den uma fu en, den man di ben e wroko ini a kownu-oso nanga den heihei sma fu a kondre. Den alamala a tyari nanga tranga gwe leki strafuman fu Yerusalem go na Babel. 16A kownu fu Babel tyari seibi dusun man di ben fiti fu feti ini a legre, makandra nanga wan dusun temreman nanga smeti nanga tranga go na Babel. Ala den man dati ben tranga èn fiti fu go na feti. 17Dan a kownu fu Babel poti Matanya, a omu fu Yoyakin, leki kownu ini en presi èn a gi en a nen fu Sedekia.
