1Siksi dei baka dati, Yesus teki Petrus nanga den tu brada Yakobus nanga Yohanes, tyari go na tapu wan hei bergi pe den wawan ben kan de. 2Dan let' na den fesi a skin fu Yesus kenki. En fesi ben brenki leki a son, èn En krosi ben kon weti taki a e brenki leki wan krin faya. 3Dan wantron so Moses nanga Elia ben de fu si, e taki nanga Yesus. 4Ne Petrus taigi Yesus taki: “Masra, a bun taki wi de dyaso. Efu Yu wani, mi kan meki dri tenti dya: wan gi Yu, wan gi Moses nanga wan gi Elia.” 5Petrus no ben kba taki ete, di wan brenki wolku saka kon na den tapu. Dan wan sten taki kmopo ini a wolku taki: “Disi na Mi Manpikin di Mi lobi. Mi abi prisiri nanga En. Un mus arki san A e taki.” 6Di den man di ben e teki leri fu Yesus yere a sten, den skreki sote taki den trowe densrefi langalanga na gron. 7Ma Yesus go na den, A fasi den, dan A taigi den taki: “Opo, un no abi fu frede.” 8Di den opo den ai, den si Yesus wawan.
9Di den e saka fu a bergi Yesus warskow den taki: “Un no mus taigi no wan sma san un si, te leki a Manpikin fu Libisma dede èn kon baka na libi.” 10Dan den aksi En taki: “Fu sanede den sabiman fu Gado wèt e taki tak' Elia mus kon fosi a Mesias doro?” 11Yesus piki den taki: “Elia o kon fu tru, èn a o seti ala sani. 12Ma Mi e taigi un taki: Elia kon kba, ma den no ben sabi taki na en, dan den du nanga en san den ben wani. Na so a Manpikin fu Libisma o abi fu nyan pina fu den tu.” 13So den man di ben e teki leri fu Yesus kon ferstan taki A ben e taki fu Yohanes a Dopuman.
