1Fa kownu Hiskia yere den sani dati, na so a priti en krosi, a weri lowkrosi dan a go ini a oso fu MASRA. 2Dan a seni Elyakim, a edeman fu den knekti fu en, Sebna, a sekretarsi fu en, nanga den moro owru priester go nanga lowkrosi na a profeiti Yesaya, a manpikin fu Amos. 3Den taigi en taki: “Disi Hiskia e taki: ‘A dei disi na wan dei fu benawtu, fu strafu nanga fu syen. Bika wan pikin mus gebore, ma krakti no de fu pusu en kon na doro. 4Kande MASRA, yu Gado, yere den wortu fu a ofisiri nanga san a basi fu en, a kownu fu Asur, seni en kon fu afrontu a libi Gado. Kande MASRA, yu Gado, sa strafu en fu den wortu di A yere. Dat' meki mi e aksi yu fu yu begi gi den wan di tan abra ete.’ ” 5Di den knekti fu kownu Hiskia doro na Yesaya, 6Yesaya taigi den taki: “Un taigi un basi taki na so MASRA taki: ‘No frede gi den sani di yu yere, den sani di den knekti fu a kownu fu Asur taki fu afrontu Mi. 7Yere, Mi o seni wan yeye fu bruya en. A o yere taki sma taki sani, di o meki a drai go baka na en kondre. Dan drape, ini en eigi kondre, Mi o meki den kiri ini wan feti.’ ”
8Dan a ofisiri drai go na a kownu fu Asur, bika a ben kisi fu yere taki a kownu ben broko en kampu na Lakis dan a hari go feti na a foto Libna. 9Ma di kownu Sanherib kisi a boskopu taki kownu Tirhaka fu Etiopia e hari kon feti nanga en, a seni boskopuman fu en go na Hiskia nanga a boskopu disi: 10“Na disi un mus taigi Hiskia, a kownu fu Yuda: ‘No meki a Gado fu yu, tapu san yu e fertrow, bedrigi yu fu taigi yu taki Yerusalem no o kon ini anu fu a kownu fu Asur. 11Arki, yusrefi yere san den kownu fu Asur du nanga den kondre di den teki abra. Den broko den pis'pisi te na gron. No wan sma o man ferlusu yu. 12Di den afo fu mi broko den foto Gosan, Haran, nanga Resef, èn di den figi den Edomitisma ini Telasar puru na pasi, den gado fu den no ben man yepi den. 13Pe a kownu fu Hamat de, a di fu Arpad, a di fu Sefarwain, nanga den di fu Hena nanga Iwa?’ ”
