1 Wan sma di e pina ma tapu san trawan no man sori finga,
betre moro wan don sma di gwenti lei.
2 A angri fu du wan sani sondro fu abi ferstan fu a sani, no bun,
a sma di lobi fu lon du sani es'esi, o meki fowtu.
3 Na a donfasi fu wan sma e pori en eigi libi,
ma na tapu MASRA en ati e bron.
4 Wan guduman e kisi nyun mati dorodoro,
ma wan pôtiman e lasi den di fu en.
5 Wan sma di e lei gi trawan fesi krutubakra,
o kisi en strafu nomonomo,
wan sma di e ferteri lei, e kisi en pai.
6 Furu sma e meki muiti fu prenspari sma kan lobi den,
ala sma wani de mati fu sma di lobi gi.
7 Efu no wan fu den brada fu wan pôtisma lobi en,
o moro den mati fu en. Den dati e tan fara fu en.
Efu a e suku fu taki nanga den, den no de fu feni.
8 A sma di e meki muiti fu kon koni, lobi en libi,
èn a sma di e du sani nanga ferstan, o feni bun.
9 Wan sma di e lei gi trawan fesi krutubakra,
o kisi en strafu nomonomo,
wan sma di e ferteri lei,
o dede.
10 Gudu no fiti wan don sma,
na so a no fiti srefsrefi tu taki wan srafu e tiri heihei man.
11 Wan sma di abi ferstan no e kisi atibron es'esi,
a de wan grani gi en fu gi sma pardon di meki fowtu.
12 A atibron fu wan kownu, na leki a babari fu wan lew,
ma a bunfasi fu en de leki dow tapu a grasi.
13 Wan don pikin na wan bigi problema gi en p'pa,
èn wan uma di lobi meki trobi de leki wan daki di e leki dorodoro.
14 Oso nanga gudu yu e kisi fu den bigisma fu yu,
ma wan koni uma na wan kado fu MASRA.
15 Lesi e meki sma fadon ini dipi sribi,
èn wan sma di e du sani nanga en ten o tan nanga angri.
16 A sma di e libi nanga den rai di a kisi, sa tan na libi.
ma a sma di e si dati leki noti, o dede.
17 Efu yu gi wan pôtisma wan sani,
na leki te yu e leni MASRA wan sani.
MASRA sa pai a sma baka fu a bun di a du.
18 Fon yu pikin solanga yu e si taki howpu de gi en ete,
ma no fon en te leki yu kiri en.
19 A sma di e kisi hebi atibron mus butu,
bika efu yu yepi en wan leisi, yu o abi fu tan yepi en.
20 Arki te sma e gi yu rai nanga te sma e warskow yu,
te fu kba yu o kon koni.
21 Libisma e waka nanga furu prakseri ini den ede,
ma san MASRA poti fu psa, na dati o psa.
22 Libisma abi a angri fu du bun,
a moro betre fu pina dan fu lei fesi krutubakra.
23 Sma di e lespeki MASRA e libi langa,
den e sribi switi fu den, sondro fu ogri miti den.
24 Awinsi a lesiman dipi en anu go ini wan skarki,
a lesi srefi tumsi fu tyari en go na en mofo.
25 Te wan sma di e spotu e kisi fonfon,
den wan di no sabi furu e kon srapu,
efu yu warskow wan sma di srapu,
a e kisi moro sabi.
26 A pikin di e naki en p'pa èn di e poti en m'ma na doro,
na wan takru pikin di e tyari syen kon na en tapu.
27 Mi boi, efu yu no wani arki den warskow fu mi,
dan yu kan tapu fu arki den bun rai di mi e gi yu.
28 Wan sma di no bun fu noti e teki a leti meki spotu
te a tnapu fesi krutubakra,
èn a mofo fu ogri-ati sma e swari kruktudu.
29 A strafu fu sma di e spotu e wakti den kba,
so tu a tiki gi a baka fu don sma.
