1David ben seni kari den moro bun fetiman fu Israel kon na wan baka. Makandra den ben de dritenti dusun. 2Dan a hari go nanga den alamala na Baala ini Yuda. Den go drape fu go teki a santa kisi fu Gado, a santa kisi di e tyari a spesrutu nen: a nen fu MASRA fu ala sani, di sidon tapu den kerub. 3Den ben go teki a santa kisi ini a oso fu Abinadab, di ben de tapu wan pikin bergi. Den poti a santa kisi fu Gado tapu wan nyun wagi èn Usa nanga Akio, den manpikin fu Abinadab, ben e tyari a wagi nanga a santa kisi fu Gado. 4Akio ben e waka na fesi. 5David nanga ala den Israelitisma ben e dansi gi MASRA. Den ben e meki poku nanga ala sortu instrumenti fu sipres-udu, citer, harp, tamboerijn, pikinpikin bel nanga cimbaal. 6Ma di den ben doro na a presi pe Nakon e masi a buba puru na a graan, den kaw grati dan Usa langa en anu hori a santa kisi fu Gado. 7Ne MASRA lusu a atibron fu En tapu Usa fu di a no prakseri san a du. A strafu en leti drape èn Usa dede leti na a santa kisi. 8Dan David mandi taki MASRA ben strafu Usa so hebi. Dat' meki den e kari a presi Peres-Usa te leki tide. 9Ma a srefi ten dati David kisi wan dipi lespeki gi MASRA tu, èn a aksi ensrefi taki: “Fa mi o man tyari a frantwortu fu a santa kisi fu MASRA?” 10Fu dat'ede David no ben wani taki a santa kisi fu MASRA ben mus tan na en ini a foto fu David. A meki den tyari en go poti na a oso fu Obed-Edom, wan man fu Gat. 11A santa kisi fu MASRA tan dri mun ini a oso fu Obed-Edom, èn MASRA ben e blesi Obed-Edom nanga ala sma di ben e libi na ini en oso.
